Lækjaklukka (Hydroporus nigrita)

Útbreiðsla

Evrópa, einkum Mið- og Norður-Evrópa, fjalllendi í álfunni sunnanverðri, austur til Kazakhstan og Turkestan í Asíu.

Ísland: Um land allt.

Lífshættir

Lækjaklukka finnst í margskonar vötnum jafnt á láglendi sem hálendi, allt frá stórum vötnum niður í smápolla, lygnum og hægrennandi lækjum og ám. Hún finnst í vatni allt frá nokkrum gráðum upp í um 32°C. Á hálendinu kýs hún volgar laugar. Fullorðnar bjöllur finnast allan ársins hring en fullorðin dýr brúa veturinn. Lirfur alast upp fyrst og fremst í grunnum tjörnum og pollum sem sumarsólin nær að hita, en þær þroskast nokkuð hratt á heitasta tíma sumars og ná fullum vexti í júlí til ágúst. Bæði fullorðnar bjöllur og lirfur eru rándýr í vötnum.

Almennt

Þessi litla en kvika vatnabjalla nær stundum miklum fjölda í grunnum tjörnum og pollum. Þar má sjá þær sem litla iðandi svarta depla syndandi þvers og kruss með skrykkjóttum sundtökum, stingandi afturendanum af og til upp í yfirborðið til að sækja loftbólu.

Lækjaklukka (3 mm) er minnst vatnabjallnanna íslensku. Hún er líkust dvergvaxinni brunnklukku (Agabus bipustulatus), egglaga, alsvört á lit, gljáandi, með rauðleita fætur og fyrstu liði fálmara. Afturfætur aðlagaðir sundfætur en ekki eins hærðir og árafætur brunnklukku.

Útbreiðslukort

Höfundur

Erling Ólafsson 9. maí 2017.