Dýrasafn

Ljósm. Erling Ólafsson

Í dýrasafni NÍ eru rúmlega 260 þúsund tegundasýni, en í hverju þeirra getur verið eitt eða nokkur þúsund eintök af tegundum sem lifa í sjó, ferskvatni og á landi. Dýrasafnið er grunnur rannsókna í flokkunarfræði, til að mynda á skilum milli líkra tegunda og þróunarskyldleika. Markmiðið er að safneintökin endurspegli hverskyns breytileika tegunda á öllum stigum lífsferilsins og sem víðast innan útbreiðslusvæðis þeirra. Stefnt er tölvuskráningu alls safnkostsins svo þau nýtist sem best við gerð útbreiðslukorta fyrir einstakar tegundir, samantekt á tegundatali, válistum og miðlun upplýsinga á netinu.

Dýrasafnið grunnur þess að hægt sé að ráðast í tilteknar rannsóknir, einkum þegar fullnægjandi sýni eru óaðgengileg úti í náttúrunni, eða það reynist of kostnaðarsamt og tímafrekt að afla nýrra sýna. Í dýrasafninu eru tiltæk eintök frá liðnum árum og öldum, en þau má nota til samanburðar við núlifandi eintök, t. d. ef meta á aukinn styrk ýmissa aðskotaefna í núlifandi dýrum. Dýraeintök eru lánuð tímabundið úr safninu til rannsókna eða á sýningar samkvæmt reglum um gripalán Náttúrufræðistofnunar.

okt. 2009, Guðmundur Guðmundsson