Fiðrildi
 |
| Páfiðrildi (Inachis io) er dæmigerð tegund sem berst til landsins með varningi. Ljósm. Erling Ólafsson. |
Fiðrildi (Lepidoptera) mynda ættbálk í flokki skordýra (Insecta). Fjölbreytileiki þeirra er mikill. Sumar tegundir eru afar smávaxnar en aðrar með stórvöxnustu skordýrum. Sumar tegundir eru lítið fyrir augað á meðan aðrar eru annálaðar fyrir litskrúð og glæsileik.
Fiðrildafána Íslands er afar fáskrúðug, jafnvel í samanburði við næstu lönd. Er þar landfræðilegri einangrun um að kenna að nokkru leyti sem hefur tvíþættar afleiðingar. Mörg fiðrildi eiga í erfiðleikum með að berast til landsins yfir víðfeðmt hafið. Einnig er hafið þrándur í götu plöntutegunda sem fiðrildi hafa lífsviðurværi af, en flestar tegundir fiðrilda eru nokkuð eða mjög sérhæfðar í fæðuvali.
Til ársins 2005 hafa fundist og verið nafngreindar alls 146 tegundir fiðrilda sem fundist hafa á landinu. Þar af lifa 54 tegundir villtar í náttúrunni, 34 hafa borist til landsins fyrir eigið tilstilli með vindum (flækingar), auk tveggja sem óvíst er hvort fyrrgreindra á við um. Alls eru þetta 90 tegundir. Að auki finnast hér 8 tegundir að staðaldri innanhúss, okkur mönnum til óþurftar, og 48 nafngreindar tegundir hafa borist til landsins fyrir tilstilli okkar manna, með farartækjum og varningi.
Á Náttúrufræðistofnun Íslands eru stundaðar ýmiskonar rannsóknir á fiðrildum.
Tenglar: