Könguló, könguló...

Spiderman hópur leikskólans Sæborgar með uppfylltan draum, tarantúlan hafði verið barin augum.

Að morgni dags 7. apríl 2005 fékk Náttúrufræðistofnun Íslands áhugaverða heimsókn. Þar var á ferð hópur áhugasamra drengja sem skipa Spiderman klúbb á leikskólanum Sæborg í Reykjavík. Í hópnum voru sex afar áhugasamir drengir sem komu með þrem kennurum sínum til að fræðast um köngulær og þar með öðlast frekari skilning á sjálfum Spiderman og athöfnum hans. Það var sérstaklega á óskalista drengjanna að fá að sjá tarantúlu og að leggja fjölbreytilegar spurningar fyrir Erling Ólafsson, skordýrafræðing stofnunarinnar. Áhuginn á viðfangsefninu var augljós og mikil spenna var ríkjandi, enda margt sem bar fyrir augu fróðleiksfúsra drengjanna á rannsóknastofunni. Þeir voru spurðir að því hvar stelpurnar væru en spyrjandi fékk að líta augnatillit sem gaf í skyn að viðfangsefnið væri ekki við hæfi stelpna! Það er ósk gestgjafa að heimsóknin verði ungu drengjunum eftirminnileg og að þeir hafi kvatt fróðari. Þeir voru leikskóla sínum til mikils sóma og er þeim hér með þakkað kærlega fyrir innlitið og óskað ánægjulegra stunda í Spiderman klúbbnum sínum. Áfram Spiderman!

Spiderman hópurinn leggur spurningar fyrir Erling Ólafsson, skordýrafræðing.

Á rannsóknastofunni var margt spennandi að skoða.