Mógilsá í Kollafirði, Kjós

Á Mógilsá er rannsóknastöð Skógræktar ríkisins. Starfsemin hófst árið 1968 og hefur áhersla verið lögð á rannsóknir á innfluttum trjátegundum og tilraunir með þær.

Skógræktarstöð við Esjurætur. Gróskumikill birkiskógur og fjölbreytt val erlendra trjátegunda. Þarna er gamalgróinn, gróskumikill birkiskógur og mikil fjölbreytni erlendra trjátegunda. Gildrustöðin er um 400 m frá sjó.

Ljósgildruveiðar hófust á Mógilsá vorið 2005 og var sami háttur hafður á umönnun þeirra og gildrum á Tumastöðum og Kvískerjum, þ.e. söfnunartími var sá sami og vikulegar tæmingar fóru fram á sömu dögum. Á Mógilsá var þó aðeins ein gildra, ekki tvær eins og á hinum stöðunum tveim. Umsjón er í höndum Erlings Ólafssonar.

Gildruveiðin þetta fyrsta sumar á Mógilsá var nokkuð undir 10 ára meðalveiði á Tumastöðum en fjöldi tegunda áþekkur. Alls veiddi gildran 2.842 fiðrildi og tilheyra þau 26 tegundum. Tegundaskrá

Staðsetning: 64°12´35´´N, 21°42´29´´V. Hæð 18 m y.s. Skógarjaðar við brekkurætur. Gildra á milli gróskumikils birkis og hávaxins stikagrenis.	Í undirgróðri skógarins er klóelfting ríkjandi. Þar er einnig túnvingull, axhnoðapuntur, mjaðjurt, brennisóley, túnfífill og gulvíðir.