Langfætlur (Opiliones)

Langfætla. Langleggur (Mitopus morio). Ljósm. Erling Ólafsson.

Langfætlur er ættbálkur sem telst til áttfætlna (Arachnida). Líkami langfætlna er egglaga og ólíkt köngulóm hafa þær ekkert mitti. Augun eru tvö og standa þau á stuttum stilk framarlega á líkamanum ofanverðum.

Langfætlur eru ljósfælnar og viðkvæmar fyrir þurrki. Þær halda sig því gjarnan undir steinum á daginn en fara af stað í fæðuleit þegar kvöldar. Þær eru fyrst og fremst rándýr og hræætur en geta vel bjargað sér á t.d. sveppum, jurtaleifum og sykri.

Hér á landi eru fjórar tegundir langfætlna, langleggur (Mitopus morio), spóaleggur (Oligolophus tridens), krónuleggur (Megabunus diadema) og smáleggur (Nemastoma bimaculatum).

Fyrir nokkrum árum fóru fram á Náttúrufræðistofnun Íslands undirstöðurannsóknir á langfætlufánu landsins. Markmið verkefnisins var að afla upplýsinga um hvaða langfætlur finnast á landinu og meta útbreiðslu þeirra. Þessu verkefni lauk með útgáfu rits Inga Agnarssonar „Íslenskar langfætlur og drekar“, hefti nr. 35 í ritröðinni „Fjölrit Náttúrufræðistofnunar“.