Hunangsflugur
 |
| Húshumla (Bombus lucorum) aflar safa úr blómi rósar í húsagarði. Ljósm. Erling Ólafsson. |
Hunangsflugur tilheyra ættinni Apidae en hún heyrir undir ættbálk æðvængna (Hymenoptera) í flokki skordýra (Insecta). Hunangsflugur eru félagsskordýr sem lifa og starfa margar saman í samfélögum sem saman standa af afkomendum einnar og sömu ættmóður (drottningar). Hún hefur búskapinn ein síns liðs að vori.
Ættinni tilheyra einnig fjölmargar tegundir býflugna. Alibýflugan (Apis mellifera) er þeirra kunnust enda ræktuð um allan heim til söfnunar hunangs, m.a. hérlendis þó í litlum mæli sé.
Hér á landi finnast þrjár tegundir hunangsflugna af ættkvíslinni Bombus, sem nefnast humlur. Móhumla (Bombus jonellus) hefur væntanlega verið hér um langa hríð. Garðhumla (Bombus hortorum) og húshumla (Bombus lucorum) bárust hingað á seinni hluta nýliðinnar aldar.