Ættbálkar áttfætlna

Köngulær (Araneae)

Köngulær hafa tvískiptan líkama, þar sem höfuð og frambolur eru óaðskilin og mynda oftast harðan frambol sem grannt mitti tengir við mjúkan afturbol. Augu eru oftast átta, stundum færri, og staðsett fremst á frambol. Par klóskæra er staðsett fremst á frambol og í þeim eru eiturkirtlar. Undir þeim eru síðan flóknir munnlimir, þar á meðal þreifarar sem á karldýrum gegna hlutverki kynfæra. Aftast á afturbol eru þrjú pör af spunavörtum en úr þeim kemur silki sem köngulærnar spinna úr veiðivef. Kynop kvendýra er framarlega neðan á afturbol.

Langfætlur (Opiliones)

Langfætlur hafa egglaga líkama sem skiptist í frambol og afturbol en ólíkt köngulóm er skiptingin ógreinileg. Líkamshlæutarnir eru nánast samvaxnir. Augun eru tvö og standa þau á stuttum stilk framarlega á líkamanum ofanverðum. Framarlega út við jaðar frambolsins eru blettir sem einkenna langfætlur. Þeir líkjast augum en eru í raun lyktarkirtlar sem gefa frá sér daunillan vökva dýrunum til varnar. Neðan á frambolnum eru klóskæri sem mynda griptöng. Þar fyrir aftan eru þreifarar og síðan fjögur pör afar langra og grannra ganglima. Neðan á afturbolnum er kynloka sem hylur kynfæri beggja kynja. Langfætlur hafa hvorki eiturkirtla né spunakirtla.

Drekar (Pseudoscorpiones)

Drekar minna í útliti talsvert á sporðdreka en eru auðgreindir frá þeim á því að það vantar á þá „sporðinn“, þ.e. halann. Auk þess eru þeir miklu smávaxnari. Líkaminn skiptist í frambol og afturbol án þess að skilin séu greinileg. Augu eru ýmist tvö eða fjögur framarlega á frambol. Klóskæri mynda fremsta útlimaparið af sex, en á þeim eru spunavörtur sem framleiða silki. Næstir koma langir þreifarar með kröftugri gripkló á endanum sem gera það að verkum að drekar líkjast sporðdrekum. Síðan taka við fjögur pör ganglima.

Mítlar (Acari)

Mítlar voru til skamms tíma nefndir áttfætlumaurar. Flestar tegundir þeirra eru agnar litlar, sumar ekki greinilegar með berum augum. Líkamshlutar eru vart aðskiljanlegir, höfuð, frambolur og afturbolur eru samvaxinn í einn bol, sem gjarnan er stuttur og breiður. Á sumum er líkaminn allur mjúkur en aðrar tegundir hafa harða skel. Fullvaxta dýr hafa fjögur pör ganglima en ungviði hafa þrjú pör á fyrstu þroskastigum.