Drekar (Pseudoscorpiones)

Drekar minna í útliti talsvert á sporðdreka en eru auðgreindir frá þeim á því að það vantar á þá „sporðinn“, þ.e. halann. Auk þess eru þeir miklu smávaxnari. Líkaminn skiptist í frambol og afturbol án þess að skilin séu greinileg. Augu eru ýmist tvö eða fjögur framarlega á frambol. Klóskæri mynda fremsta útlimaparið af sex, en á þeim eru spunavörtur sem framleiða silki. Næstir koma langir þreifarar með kröftugri gripkló á endanum sem gera það að verkum að drekar líkjast sporðdrekum. Síðan taka við fjögur pör ganglima.

Drekar eru rándýr. Sumir elta uppi bráð sína en aðrir sitja fyrir henni. Þeir grípa bráðina með griptöngunum og nota eitur til að lama hana áður en þeir taka til matar síns.

Drekar á Íslandi

Á Íslandi eru aðeins tvær tegundir dreka sem tilheyra sinn hvorri ættinni, Neobisidae (mosadrekar) og Cheliferidae (húsadrekar). Önnur tegundin, mosadreki (Neobisium carcinoides) lifir úti í náttúrunni á sunnan og suðaustanverðu landinu en hin, húsadreki (Chelifer cancroides), er háður manninum um vistarverur og lifir í híbýlum okkar.

PSEUDOSCORPIONES

Cheliferidae

Chelifer cancroides (Linnaeus, 1761) Húsadreki

Neobisiidae

Neobisium carcinoides (Leach, 1817) Mosadreki

 Húsadreki (Chelifer cancroides)

Íslenskt rit um dreka

Árið 1998 kom út rit eftir Inga Agnarsson „Íslenskar langfætlur og drekar“, hefti nr. 35 í ritröðinni „Fjölrit Náttúrufræðistofnunar“, þar sem höfundur gerði grein fyrir endurskoðun sinni á íslenskum drekum. Þar er tegundum lýst, útbreiðsla þeirra á landinu sýnd og gerð grein fyrir lífsháttum þeirra.