Lífsferill krossköngulóar

Lífsferill krossköngulóar (Araneus diadematus) tekur um eitt ár. Flestir kannast við köngulóarvefinn sem kvendýrin spinna til að veiða flugur en þær spinna einnig gulleitan hjúp sem þær verpa fjölmörgum eggjum í. Móðirin drepst að hausti en ungviðin leggjast í dvala inni í hjúpnum. Næsta vor koma ungviðin út úr hjúpnum og til að byrja með halda þau sig saman í hóp. Þegar þau eru orðin nógu þroskuð til að stofna eigið heimili, yfirgefa þau systkynahópinn og skríða á vit nýrra heimkynna.

Kvendýr krossköngulóar eru nokkuð stór, búkurinn er á annan sentimetra. Karldýrin eru mun minni, eins og oftast er hjá köngulóm, og halda gjarnan til í nágrenni vefs í von um að frökenin gefi þeim færi á ástarfundi. Það kemur að því að hún gefur færi á sér og eftir ástarleikina lýkur gjarnan lífi karlsins - í klóm kerlu sinnar, nema honum takist að skjótast burt í snarhasti.

Krosskönguló finnst á láglendi um land allt en er þó mun algengari sunnanlands en norðan. Hún kann ágætlega við sig á skjólsælum og sólríkum stöðum og gerir sér gjarnan vefi á klettaveggjum sem snúa mót suðri. Hún er mjög algeng í görðum á höfuðborgarsvæðinu þar sem húsveggir koma í stað klettaveggjanna úti í náttúrunni.

Ungviði krossköngulóar

nýskriðin úr hjúpnum

Krosskönguló, hálfvaxið kvendýr