Flokkar fjölfætlna

Þúsundfætlur (Diplopoda)

Þúsundfætlur hafa langan og mjóan, margliðskiptan og sívalan bol. Á kúlulaga höfði hafa þær tvær þyrpingar af allmörgum smáaugum, tvo stutta fálmara og tvo kjálka sem vita niður. Frambolur er stuttur, gerður úr fjórum einföldum liðum, þeir þrír öftustu með einu fótapari hver. Afturbolur er langur og er fjöldi liða afar breytilegur eftir tegundum. Á hverjum liðanna eru tvö pör fóta.

Margfætlur (Chilopoda)

Margfætlur hafa langan, mjóan, margliðskiptan, nokkuð flatvaxinn bol. Höfuð er flatvaxið með smáaugu sem eru ýmist í þyrpingum eða stök. Fálmarar eru langir og þráðlaga og sterkir bitkjálkar vita fram. Á fyrsta lið er sérhæft fótapar sem grípur um bráð og gefur frá sér eitur. Á öðrum liðum er eitt par ganglima. Aftasta fótapar er lengst og veit aftur frá bolnum. Fjöldi liða er breytilegur eftir tegundum.

Hvítfætlur (Symphyla)

Hvítfætlur eru smávaxnar fjölfætlur, í mesta lagi sex mm á lengd. Bolur þeirra er liðskiptur, grannur og veikbyggður, alhvítur á lit. Bakplötur eru þunnar og flatar. Kúlulaga mjókkar fram í fíngerðan bitmunn sem veit fram og niður. Hvítfætlur hafa ekki augu en fálmarar þeirra eru langir og örgrannir, gerðir úr fjölmörgum mjög stuttum liðum. Eitt par fóta er á hverjum lið bolsins, alls 12 pör. Tveir odddregnir kítínstafir vita aftur og upp frá afturenda.

Dvergfætlur (Pauropoda)

Dvergfætlur eru agnarsmáar fjölfætlur, innan við eða rúmlega einn millimetri á lengd. Liðskiptur, grannur bolurinn er gerður úr 11 eða 12 liðum, með sex bakplötur og 9 eða 10 pör fóta. Þær hafa engin augu á höfði en þrígreinda fálmara.