Bjöllur (Coleoptera)
Bjöllur eru mjög fjölbreytilegar bæði að stærð og gerð. Sumar eru agnarsmáar, aðrar með stærstu skordýrum. Flestar hafa mjög harða skel og margar hverjar eru litskrúðugar. Fálmarar mjög breytilegir, munnlimir oftast sterkir bitkjálkar. Fyrsti liður frambols stór og hreyfanlegur en aftari liðir samvaxnir afturbol. Að grunni til hafa bjöllur tvö pör vængja. Aftara pari
ð er notað til flugs en þegar flugvængirnir eru ekki í notkun eru þeir brotnir saman og geymdir undir fremri vængjunum sem eru ummyndaðir í harða skel, svokallaða skjaldvængi. Margar bjöllur hafa misst flugvængina.
Bjöllur mynda stærsta ættbálk skordýra, en yfir 350.000 tegundir eru þekktar í heiminum. Lífshættir bjallna eru því afar fjölbreytilegir. Langflestar tegundir lifa á þurru landi en einnig eru margar tegundir í vatni. Sumar bjöllur eru rándýr, aðrar plöntuætur og margar lifa á rotnandi jurta- eða dýraleifum. Nokkrar bjöllutegundir finna sér lífsviðurværi í híbýlum, sækja í matvörur fólks og innanstokksmuni og eru því illa þokkaðar á heimilum og í matvælafyrirtækjum.
Gullsmiður (Amara quenseli)
Bjöllur á Íslandi
Á Íslandi finnast um 150 bjöllutegundir í náttúrunni en aðrar 30 kjósa heldur nábýli við mannfólkið. Að auki hafa um 60 nafngreindar tegundir borist til landsins með varningi án þess þó að ná fótfestu hér á landi, auk fjölmargra sem ekki hafa verið skilgreindar frekar.
Jötunuxaættin (Staphylinidae) er fjölliðuðust með 69 tegundir. Járnsniðsætt (Carabidae) er næst með 27 innlendar tegundir og ranabjölluætt (Curculionidae) skipa 18 innlendar tegundir. Bjöllur má finna hvarvetna, allt frá sjávarströndum til hæstu fjalla, eyðimelum og söndum til blómskrúðs og skóga. Allmargar tegundir finnast í híbýlum okkar, sumar hverjar okkur til óþurftar. Bjöllur eru því meðal mest áberandi skordýra á Íslandi.
Trjákeppur (Otiorhynchus singularis)
Aðgangur að tegundaskrá er í undirbúningi.