Fiðrildi (Lepidoptera)
Fiðrildi eru afar breytileg að stærð, sum eru smávaxin en önnur með stórvöxnustu skordýrum. Bolur þeirra er frekar mjúkur og viðkvæmur, allur þakinn hreisturflögum í s
tað hára. Á kúlulaga höfði eru stór augu og langir, grannir og margliðskiptir fálmarar, stundum með hnúð á endanum. Munnlimir mynda langan sograna sem hringast upp undir höfuðið þegar hann er ekki í notkun. Tvö pör af stórum vængjum, sem í hvíld liggja ýmist flatir saman lóðrétt upp frá bolnum, eða lárétt flatir eða hvelfdir yfir honum. Hreistrið myndar oft einkennandi litmynstur á vængjum.
Mörg fiðrildi eru annáluð fyrir litskrúð og glæsileik. Önnur eru minna fyrir augað. Fullorðin fiðrildi nærast fyrst og fremst á blómasafa, en lirfur flestra tegunda éta laufblöð og geta skaðað gróður. Sumar tegundir nærast á dýrahárum, fiðri fugla og kornmat og geta valdið okkur mönnum tjóni.
Páfiðrildi (Inachis io)
Fiðrildi á Íslandi
Fiðrildafána Íslands er afar fáskrúðug, jafnvel í samanburði við næstu lönd. Er þar landfræðilegri einangrun um að kenna að nokkru leyti sem hefur tvíþættar afleiðingar. Mörg fiðrildi eiga í erfiðleikum með að berast til landsins yfir víðfeðmt hafið. Einnig er hafið þrándur í götu plöntutegunda sem fiðrildi hafa lífsviðurværi af, en flestar tegundir fiðrilda eru nokkuð eða mjög sérhæfðar í fæðuvali.
Á Íslandi hafa fundist 147 tegundir fiðrilda sem hafa verið nafngreindar. Þar af eru aðeins 54 tegundir villtar í náttúrunni og 8 finnast innanhúss. Alls hafa 34 tegundir borist til landsins á eigin vængjum og sumar hverjar fjölgað sér hingað komnar, ef aðstæður hafa leyft. Alls 50 nafngreindar tegundir hafa borist hingað fyrir tilstilli mannsins, með varningi og
farartækum. Ein innanhússtegund er horfin úr fánunni.
Skrautleg dagfiðrildi lifa ekki hérlendis en berast hingað gjarnan með vindum og varningi. Íslenskar tegundir tilheyra hópi sem gjarnan kallast náttfirðildi, þó það segi lítið til um innbyrðis skyldleika þeirra. Flestar tegundanna tilheyra ygluætt (Noctuidae) eða 39, en margar yglur eru einkar öflugar til langflugs og geta borist langar vegalengdir frá heimkynnum sínum, m.a. yfir opið haf. Fetaætt (Geometridae) er einnig fjölliðuð með 20 tegundir. Fetar eru einna mest áberandi hér á landi ásamt vefurum, en vefaraætt (Tortricidae) telur 9 innlendar tegundir. Þar á meðal er grasvefari (Eana osseana) sem er algengasta fiðrildið á landinu.
Skrautfeti (Dysstroma citrata)
Aðgangur að tegundaskrá er í undirbúningi.
Víðimölur (Matilella fusca)