Flær (Siphonaptera)
Flær eru einsleit skordýr þar sem hver tegundin er annarri lík í sköpulagi vegna mjög sérþróaðra lífshátta. Þær eru smávaxnar, hliðflatar og vængjalausar, brúnar á lit. Augu eru einföld eða vantar, fálmarar stuttir, í hvilftum, og munnlimir gerðir til að stinga og sjúga blóð. Fætur með sterkum göddum og klóm, vel aðlagaðir því að hanga í hárum eða fjöðrum og til að stökkva.
Flær eru blóðsugur á dýrum með heitt blóð. Þær halda sig í bælum eða hreiðrum hýsla sinna og tímgast fyrri part sumars. Lirfurnar, litlir hvítir ormar, alast þar upp og nærast á rotnandi lífrænum leifum þar til þær púpa sig þegar haustar. Ef allt gengur sem skyldi klekjast flærnar úr púpum þegar eigendur bælisins/hreiðursins vitja þess á næsta vori. Ef enginn vitjar bælisins verða flærnar svangar og fara á flakk í leit að næringu. Stundum skríða þær í einhverjum mæli úr púpum í hlýindaköflum á haustin.
Flær á Íslandi
Á Íslandi hafa fundist tíu tegundir flóa. Ein þeirra, mannafló (Pulex irritans), virðist þó horfin. Af hinum lifa sex á fuglum og þrjár á nagdýrum. Þrjár þeirra eiga það til að angra okkur mannfólkið. Rottufló (Nosopsyllus fasciatus) fylgir stundum rottu- og músagangi, dúnfló (Ceratophyllus garei) þekkja æðarræktarbændur vel en hænsnafló eða starafló (Ceratophyllus gallinae) er líklega sú tegund sem flesta angrar.
SIPHOPHONAPTERA
Ceratophyllidae
Ceratophyllus borealis Rothschild, 1907
Ceratophyllus gallinae (Schrank, 1803) Hænsnafló, starafló
Ceratophyllus garei Rothschild, 1902 Dúnfló
Ceratophyllus vagabundus Boheman, 1866
Dasypsyllus gallinulae gallinulae (Dale, 1878)
Mioctenopsylla arctica Rothschild, 1922
Nosopsyllus fasciatus (Bosc, 1800) Rottufló
Histrichopsyllidae
Ctenophthalmus nobilis (Rothschild, 1989) Músafló
Pulicidae
Chenocephalides felis (Bouché, 1835) Kattafló
Pulex irritans Linnaeus, 1758 Mannafló