Klaufhalar (Dermaptera)
Klaufhalar eru meðalstór skordýr. Fremra vængjapar hefur ummyndast í litlar plötur en þær hylja samanbrotna afturvængi sem brúkast til flugs. Klaufhalar hafa langa, þráðlaga, margliða fálmara. Á afturenda eru tveir harðir kítínstafir sem mynda nokkurs konar griptöng. Á henni þekkjast klaufhalar auðveldlega.
Klaufhalar eru einkum næturdýr og halda sig undir steinum, í gróðri eða á öðrum frekar þröngum, dimmum stöðum á daginn. Stundum má þó sjá þá á flugi á daginn þegar vel viðrar. Þeir eru alætur.
Klaufhalar á Íslandi
Ein tegund klaufhala, garðaklampi eða garðaklaufhali (Forficula auricularia), berst oft til Íslands með varningi, einkum grænmeti og ávöxtum. Stöku sinnum hefur hann náð hér tímabundinni fótfestu í húsum. Hugsanlegt er að hann lifi hér í einhverjum mæli í gróðurhúsum.
Garðaklampi (Forficula auricularia), ungviði
DERMAPTERA
Forficulidae
Forficula auricularia Linnaeus, 1758 Garðaklampi