Naglýs (Mallophaga)

Naglýs eru smávaxin sníkjudýr á fuglum og spendýrum. Þær lifa utan á hýslum sínum og naga fiður, hár og húðflögur. Naglýs eru flatvaxnar og vængjalausar. Höfuð er breitt, lítil eða engin augu, fálmarar stuttir og munnlimir gerðir til að naga. Fætur með sterkar klær og vel búnir til að tryggja festu á hýslinum.

Flestar tegundir eru afar sérhæfðar og finnast aðeins á einni tegund hýsils eða fáeinum náskyldum tegundum. Þannig hafa naglýs nýst við skyldleikarannsóknir á fuglum. Auk þess eru naglýs gjarnan fastbundnar ákveðnum stað á hýslinum. Þannig er t.d. sjaldnast um sömu tegund að ræða á höfði fugls og undir vængjum hans.

Naglýs á Íslandi

Alls hefur 61 tegund naglúsa fundist á fuglum okkar og spendýrum, en margra fleiri mætti vænta með markvissum rannsóknum. Þessi áhugaverði dýrahópur er illa rannsakaður hér á landi. Nafnkunnar eru þrjár náskyldar tegundir á húsdýrum okkar, kúalús (Bovicola bovis), hrossalús (Bovicola equi) og sauðalús (Bovicola ovis).

Aðgangur að tegundaskrá er í undirbúningi.