Skortítur (Hemiptera)

Skortítur eru afar fjölbreytilegur og tegundaríkur ættbálkur, að mestu skipaður smáum og meðalstórum skordýrum. Fálmarar oftast gerðir af tiltölulega fáum en löngum liðum. Munnlimir mynda mislangan sograna sem dýrin stinga inn í vefi plantna og dýra til að sjúga upp næringu og er hann einkennandi fyrir ættbálkinn. Skortítur hafa ýmist tvö pör vængja eða eru vængjalausar, framvængir ýmist horn- eða leðurkenndir eða himnukenndir eins og afturvængirnir.

Ættbálkurinn deilist í tvo vel aðgreinda undirættbálka, títur (Heteroptera) og tifur (Homoptera), sem sumir fræðimenn kjósa að túlka sem fullgilda ættbálka. Langflestar tegundir skortítna nærast á plöntusafa, t.d. blaðlýs og skjaldlýs. Þar á meðal eru tegundir sem leggjast svo þungt á hýsilplöntur sínar að þær líða fyrir og dregið getur úr afrakstri nytjaplantna. Aðrar skortítur leggjast á önnur dýr.

Fnyktítan Nezara viridula er slæðingur á Íslandi

Skortítur á Íslandi

Fundist hafa á bilinu 90-100 tegundir skortítna á Íslandi. Þar vega blaðlýs þyngst, þó margt sé ógert í þeim fræðum. Jurtasugur eru í miklum meirihluta. Flagtíta (Salda littoralis) leggst á önnur smádýr, en veggjalús (Cimex lectularius) er skæð blóðsuga sem nýtur húsaskjóls í híbýlum okkar og tekur mannfólki blóð sér til lífsviðurværis.

Aðgangur að tegundaskrá er í undirbúningi.

Veggjalús (Cimex lectularius)