Vorflugur (Trichoptera)

Vorflugur eru meðalstór eða frekar stór skordýr með nokkuð mjúkan búk, oftast einlitar gul- eða grábrúnar. Á höfði eru langir þráðlaga, margliðskiptir fálmarar, áberandi augu og munnur sem líkist bitmunni þó eiginlega kjálka vanti. Hærðir vængir mynda risþak yfir bolnum í hvíldarstöðu, afturvængir mun breiðari en framvængir.

Vorflugur líkjast fiðrildum enda eru þessir tveir ættbálkar náskyldir. Þær hafa þó ekki hreistraða vængi og munnlimir mynda ekki sograna. Fullorðin dýr nærast einkum á blómasafa. Á æskustigum lifa vorflugur í vatni. Lirfurnar byggja um sig pípulaga hýði úr plöntuleifum eða sandi sem ver viðkvæman búkinn. Þær éta lifandi og dauðar vatnaplöntur og þörunga.

Vorflugur á Íslandi

Á Íslandi hafa fundist 12 tegundir vorflugna, sem tilheyra þremur ættum. Þær lifa ýmist í straumvatni eða lygnum tjörnum og vötnum. Flestar tegundanna eru algengar og útbreiddar um land allt. Þrátt fyrir heitið eru vorflugur mest áberandi á flögri er líða tekur á sumar.

Glæsibytta (Limnephilus elegans)

TRICHOPTERA

Apataniidae

Apatania zonella (Zetterstedt, 1840)               Lækjabytta

Limnephilidae

Grammataulius nigropunctatus (Retzius, 1783)  Flóðbytta

Limnephilus affinis Curtis 1834                      Lindabytta

Limnephilus decipiens (Kolenati, 1848)           Sefbytta

Limnephilus elegans Curtis, 1834                   Glæsibytta

Limnephilus  fenestratus (Zetterstedt, 1840)    Flikrubytta

Limnephilus griseus (Linnaeus, 1758)             Grábytta

Limnephilus picturatus McLachlan, 1875           Tjarnabytta

Limnephilus sparsus Curtis, 1834                   Sytrubytta

Micropterna lateralis (Stephens, 1837)

Potamophylax cingulatus (Stephens, 1837)       Straumbytta

Phryganeidae

Agrypnia picta Kolenati, 1848                         Starbytta