Sniglar (Gastropoda)

Sniglar mynda flokk lindýra (Mollusca). Langflestir þeirra lifa í sjó eða ferskvatni og anda með tálknum. Einn hópur snigla, lungnasniglar (Pulmonata), hefur aðlagast lífi á landi og eru þeir flestir landdýr þó sumir haldi sig í ferskvatni. Hér á landi eru eingöngu lungnasniglar.

Lungnasniglar geta verið með eða án kuðungs. Þeir sem eru án kuðungs eru allir á landi en kuðungasniglar eru ýmist land- eða ferskvatnssniglar. Sniglarnir eiga það allir sameiginlegt að þurfa mikinn raka. Þeir halda sig því gjarnan á rökum stöðum á daginn, svo sem undir steinum og lausum munum, en skríða úr fylgsnum sínum á kvöldin og í röku veðri.

Flestir sniglar eru jurtaætur og þegar þeir ná talsverðum fjölda verða þeir oft á tíðum skaðvaldar í matjurta- og skrautjurtagörðum. Margir gæða sér einnig á hræjum, skít eða jafnvel öðrum sniglum.

Á Íslandi hafa fundist 39 tegundir snigla á landi og í ferskvatni. Þær tilheyra 19 ættum. Níu tegundanna eru án kuðungs og er tiltölulega lítið um margar þeirra vitað. Spánarsnigill (Arion lusitanicus) er nýr landnemi sem rétt er að hafa gætur á.

Brekkusnigillinn Deroceras agreste

• Spánarsnigill