Góður rómur var gerður að erindi Sigmundar Einarssonar um Búrfellshraun á Hrafnaþingi síðastliðinn miðvikudag. Á sjötta tug manna hlýddu á erindið sem haldið var í nýjum húsakynnum Náttúrufræðistofnunar í Urriðaholti.

Hafist var handa við vöktun fiðrilda hér á landi árið 1995 og stóð Náttúrufræðistofnun Íslands að því. Verkefnið hefur eflst til mikilla muna á seinni árum, en áhugamaður undir Eyjafjöllum, nokkrar náttúrustofur og Landbúnaðarháskóli Íslands hafa komið inn í verkefnið. Undanfarið hafa starfsmenn þriggja náttúrustofa fengið þjálfun í tegundagreiningum í hinni nýju aðstöðu sem Náttúrufræðistofnun hefur upp á að bjóða á Urriðaholti í Garðabæ.

Sigmundur Einarsson, jarðfræðingur á Náttúrufræðistofnun, mun flytja erindi um Búrfellshraunið á Hrafnaþingi á morgun, 26. janúar.

Dagskrá Hrafnaþings á vormisseri hefur nú verið birt á vef stofnunarinnar. Fyrirlestrar eru úr ýmsum áttum innan náttúrufræðinnar en nokkur erindi fjalla um náttúrufar í Urriðaholti, ný heimkynni Náttúrufræðistofnunar.

Viðkomubrestur og fækkun í varpstofnum kría við Norður Atlantshaf hefur verið viðloðandi í rúman áratug og víða verið tengd ætisskorti. Skortur á viðunandi æti til ungauppeldis veldur hægum vaxtaþroska unga og leiðir oft til víðtæks ungadauða í vörpunum. Að hvaða marki ætisskortur stýrir víðtækum varpbresti má meta með mælingum á hve samstillt tímasetning ungadauða er innan og milli varpa, ásamt mælingum á fæðu, tíðni fæðugjafa og ungavexti. Um þetta fjallar Freydís Vigfúsdóttir, líffræðingur á Náttúrufræðistofnun og doktorsnemi í dýravistfræði, í erindi á fræðslufundi Fuglverndar þriðjudagskvöldið 18. janúar.

Fréttavefurinn strandir.is greinir frá endurheimt kríu sem merkt var við Bakkagerði á Ströndum í júlí 2009. Krían fannst í Brasilíu, eða um 9996 kílómetra frá merkingarstaðnum í Bakkagerði. Náttúrufræðistofnun hefur umsjón með fuglamerkingum á Íslandi og tók á móti tilkynningunni. Um að ræða fyrstu endurheimtu íslenskrar kríu frá Suður-Ameríku.

Meistaranemi við auðlindadeild Háskólans á Akureyri og sérfræðingar á Náttúrufræðistofnun vinna nú að erfðafræðirannsóknum á fálka og rjúpu en sameindaerfðafræðilegar aðferðir eru notaðar við erfðagreiningu á sýnum sem safnað hefur verið síðastliðin þrjátíu ár. Þetta er gert til að varpa ljósi á líffræðilegan fjölbreytileika og vistfræði þessara tegunda.

Íbúi í Hafnarfirði kom með væna grein af jólatrénu sínu til Náttúrufræðistofnunar en tréð hafði reynst líflegra en við var búist. Tréð, sem hann hafði keypt í ræktunarreit í Mosfellsbæ, tók að iða af lífi þegar það var komið á sinn stað inni í stofu.