Enn mælast háar frjótölur á höfuðborgarsvæðinu
Hlýindin undanfarið hafa opnað blóm nokkurra grastegunda sem spretta seint og ná ekki að dreifa frjókornum öll sumur. Frjótölur í Reykjavík nálguðust 100 á þriðjudag. Fólk með grasofnæmi finnur vel fyrir þessu.
Það hvessti á þriðjudag og hitastig nálgaðist 20°C loftið var tiltölulega þurrt og þá er ekki að sökum að spyrja frjótala grasa rauk upp og þann sólarhring (14.8.) reyndust 97 grasfrjó fara um hvern rúmmetra lofts við Bústaðaveginn. Í Urriðaholti var frjótalan heldur lægri en samt há á mælikvarða jaðarbyggðarinnar eða 62 frjó/m3. Í ágúst má alltaf reikna með svona toppum syðra en þeir standa venjulega aðeins í fáa daga. Topparnir eru fylgifiskar hlýinda og þurra vinda. Sumarið 2011 urðu þeir fjórir og einn kom í byrjun septemeber. Fólk með grasofnæmi finnur fyrir þessu jafnvel þó frjótölur verði sjaldan mjög háar svona síðsumars.
 |
|
Nýútsprungið gras (líklega húsapuntur) við Glæsibæ (16.8.). ©MH |
 |
|
Gras er enn að blómstra. Myndin er tekin af túnbleðli í Laugardal í Reykjavík sem slapp undan slætti þetta sumarið og hefur þess vegna orðið drjúg uppspretta frjókorna og er enn (16.8.) því nú blómstra þar bæði vallarfoxgras og hálíngresi og dreifa frjókornum. ©MH |
Sjá nánar um frjófréttir