Fréttir
Nýtt gróðurkort af Hrísey og útbreiðslu ágengra tegunda
Hjá Náttúrufræðistofnun Íslands er komin út ný skýrsla um gróðurfar í Hrísey og fylgir henni gróðurkort af eynni. Skýrslan er unnin fyrir Akureyrarbæ en vettvangsvinna hófst haustið 2007. Markmið með verkefninu var að fá yfirlit yfir gróðurfar í Hrísey og var sérstök áhersla lögð á að kortleggja útbreiðslu alaskalúpínu og skógarkerfils og fá þannig skýra mynd af framgangi þessara tegunda sem hafa breiðst hratt út í Hrísey á síðustu áratugum. Jafnframt væri hægt að spá fyrir um líklegar breytingar í framtíðinni. Auk gróðurkorta af Hrísey er útbreiðsla alaskalúpínu, skógarkerfils og ætihvannar rakin og birt á kortum í skýrslunni.
Gróðurfar í Hrísey einkennist af víðáttumiklu mólendi. Á undanförnum áratugum hafa alaskalúpína, skógarkerfill og ætihvönn orðið ríkjandi í gróðri á norðurhluta eyjarinnar. Alaskalúpína hefur verið meginfrumherji en skógarkerfill og ætihvönn hafa fylgt henni fast eftir. Kerfillinn hefur einnig lagt undir sig tún á norðurhluta eyjarinnar. Sauðfjárbeit lagðist af í Hrísey árið 1974 sem gaf þessum plöntutegundum lausan tauminn. Árið 2007 höfðu lúpína, kerfill og hvönn lagt undir sig um 90 ha eða 12% eyjarinnar. Með sama áframhaldi er líklegt að Hrísey verði öll undirlögð af þessum tegundum innan 50 ára.
 |
 |
| Lúpína nemur land í beitilyngsmóa í Hrísey. Ljósm. Guðmundur Guðjónsson. | Fjölbreyttur gróður í lyngmóa, krækilyng, aðalbláberjalyng, litunarjafni og sauðamergur. Ljósm. Rannveig Thoroddsen. |
 |
 |
| Breiður af alasklúpínu, skógarkerfli og ætihvönn í Hrísey. Ljósm. Guðmundur Guðjónsson. | Brautir eru slegnar í gegnum lúpínubreiður á vorin til að auðvelda æðarkollum leið að sjó með unga sína. Ljósm. Rannveig Thoroddsen. |
Á vef Náttúrufræðistofnunar má nálgast bæði skýrsluna og gróðurkortið af Hrísey:
Skýrsla NÍ-09011 - Gróðurkortlagning Hríseyjar 2007