Nýtt Fjölrit um vöktun válistaplantna
Fimmtugasta Fjölrit Náttúrufræðistofnunar er komið út og fjallar það um vöktun válistaplantna árin 2002-2006. Í ritinu er gerð grein fyrir 47 plöntutegundum og vaxtarsvæðum þeirra, þar af eru 38 tegundir á válista og 21 tegund friðuð samkvæmt lögum. Höfundar eru Hörður Kristinsson, Eva G. Þorvaldsdóttir og Björgvin Steindórsson.
Árið 2002 hófst samstarf milli Náttúrufræðistofnunar Íslands, Grasagarðs Reykjavíkur og Lystigarðs Akureyrar um rannsóknir á sjaldgæfum plöntum, flestar annað hvort á válista eða friðaðar með lögum. Í vettvangsferðum voru plöntur staðsettar með GPS hnitum og stærð vaxtarsvæðis þeirra könnuð. Slíkar rannsóknir eru forsenda fyrir válistaflokkun tegundanna. Auk þess voru tekin sýni til ræktunar og fjölgunar í grasagörðunum.
Í Fjölritinu er gerð grein fyrir tveimur aðferðum sem þróaðar hafa verið hér á landi til að meta hversu algengar eða sjaldgæfar plöntur eru á landinu og út frá þeim er lagt mat á verndargildi plantnanna. Þá er sagt frá árangri grasagarðanna af ræktun og fjölgun þeirra plantna sem sýnum var safnað af.
Samkvæmt niðurstöðum þessa verkefnis er staða flestra tegunda stöðug, sumar jafnvel í sókn. Vaxtarsvæði þriggja tegunda virðist vera fremur í hnignun (fjallkrækill, fjallabláklukka og maríulykill) og tvær tegundir hafa ekki fundist (flæðarbúi, mosaburkni).
Hægt er að nálgast rafræna útgáfu af Fjölritinu (PDF-skjal, 6 MB) með því að smella á myndina.
Eldri útgáfur af Fjölriti Náttúrufræðistofnunar
Ritstjóri: Margrét Hallsdóttir