Ársfundur Náttúrufræðistofnunar Íslands 2007
Á ársfundinum var heiðursviðurkenning stofnunarinnar veitt í fyrsta sinn dr. Arnþóri Garðarssyni, prófessor við Háskóla Íslands, fyrir ómetanlegt framlag til rannsókna og vöktunar á náttúru Íslands og frumkvöðlastarf í verndun íslensks votlendis. Arnþór birti sína fyrstu grein um fuglalíf á Seltjarnarnesi aðeins 17 ára gamall og hefur allt frá því sett sterkan svip á náttúrufræðirannsóknir og kennslu. Með heiðursviðurkenningu Náttúrufræðistofnunar Íslands fylgdi útskorinn hrafn eftir Ragnhildi Magnúsdóttur, betur þekkt sem Ranka í Kotinu, sem er handverksmaður ársins 2006.
Þá var dr. Hörður Kristinsson, grasafræðingur, sæmdur gullmerki stofnunarinnar fyrir ómetanlegt framlag til grasafræðirannsókna á Íslandi, en hann á heiður að uppbyggingu gagnagrunns stofnunarinnar um íslenskar plöntur.
Mat á verndargildi háhitasvæða og ástand og vöktun sjófuglastofna voru umræðuefni í fræðilegri dagskrá fundarins. Kristján Jónasson, jarðfræðingur, greindi frá rannsóknum á verndargildi jarðminja á háhitasvæðum sem hófust vorið 2007 og Ásrún Elmarsdóttir, plöntuvistfræðingur, gerði grein fyrir rannsóknum og flokkun á gróðurfari þessara svæða sem staðið hefur frá árinu 2005. Ævar Petersen, fuglafræðingur, fjallaði um ástand sjófuglastofna á Norður-Atlantshafi og Guðmundur A. Guðmundsson, dýravistfræðingur, greindi frá rannsóknum á stofnstærð og vöktun bjargfugla á Íslandi.
Ársskýrslur Náttúrufræðistofnunar Íslands.
 |
 |
| Arnþór Garðarsson, prófessor, tók á móti Heiðursviðurkenningu Náttúrufræðistofnunar Íslands. Ljósm. Ágúst Ú. Sigurðsson. | Hörður Kristinsson, grasafræðingur, sæmdur gullmerki Náttúrufræðistofnunar Íslands. Ljósm. Ágúst Ú. Sigurðsson. |