Fréttir

Náttúrufræðistofnun skiptir miklu máli að mati mikils meirihluta þjóðarinnar

Fri, 5 Mar 2010 02:24:27 +0000

Það er ánægjulegt að geta sagt frá því að um 72,5% landsmanna telur að starfsemi Náttúrufræðistofnunar skipti miklu máli. Þetta kemur fram í athugun sem Capacent Gallup gerði fyrir Náttúrufræðistofnun í febrúarmánuði, samhliða venjulegum spurningavagni, og er sambærilegt við niðurstöður könnunarinnar undanfarin ár. Jón Gunnar Ottósson forstjóri Náttúrufræðistofnunar segist mjög sáttur við það traust og viðhorf til stofnunarinnar sem birtist í niðurstöðunum. „Það er mjög ánægjulegt að sjá þessar jákvæðu niðurstöður núna á þessum erfiðu tímum“ segir Jón Gunnar.

Hrafnaþing 10. mars: Flokkun og verndargildi gróðurs og landgerða á háhitasvæðum á Íslandi

Thu, 4 Mar 2010 14:03:37 +0000

Ásrún Elmarsdóttir, plöntuvistfræðingur hjá Náttúrufræðistofnun, flytur erindi sitt og Olgu Kolbrúnar Vilmundardóttur „Flokkun og verndargildi gróðurs og landgerða á háhitasvæðum á Íslandi“ á Hrafnaþingi miðvikudaginn 10. mars næstkomandi.

Hrafnaþing 10. febrúar: Flokkun og verndargildi jarðminja á háhitasvæðum á Íslandi

Fri, 5 Feb 2010 01:52:12 +0000

Kristján Jónasson, jarðfræðingur hjá Náttúrufræðistofnun Íslands, flytur erindi sitt og Sigmundar Einarssonar „Flokkun og verndargildi jarðminja á háhitasvæðum á Íslandi“ á Hrafnaþingi miðvikudaginn 10. febrúar næstkomandi.

Hvítabjörn í Þistilfirði - fréttatilkynning um fyrstu niðurstöður athugana

Mon, 1 Feb 2010 15:17:43 +0000

Hvítabjörn var felldur skammt frá Óslandi í Þistilfirði 27. janúar s.l. Eftir að hafa tekið feldinn af dýrinu á Sauðárkróki var björninn fluttur til Reykjavíkur. Samkvæmt beiðni frá Náttúrufræðistofnun Íslands krufði Karl Skírnisson dýrafræðingur á Tilraunastöðinni á Keldum björninn ásamt þeim Ólöfu Guðrúnu Sigurðardóttur, meinafræðingi á Keldum og Þorvaldi Björnssyni, hamskera á Náttúrufræðistofnun. Fyrstu niðurstöður athugana eru í meðfylgjandi fréttatilkynningu.

Að gefnu tilefni - Hvítabirnir á Íslandi

Wed, 27 Jan 2010 05:50:44 +0000

Tæplega 600 hvítabirnir, Ursus maritimus, hafa sést hér við land frá upphafi Íslandsbyggðar og er það lágmarkstala. Elsta heimildin er frá um 890 þegar Ingimundur gamli, landnámsmaður í Vatnsdal, sá birnu með tvo húna og að sögn varð þá til örnefnið Húnavatn í Þingi í Austur-Húnavatnssýslu.

Úrslit teiknisamkeppni um bestu tígrisdýramyndina í tengslum við sýninguna Að spyrja Náttúruna - saga Náttúrugripasafnsins

Mon, 18 Jan 2010 05:19:05 +0000

Sýningu Náttúrufræðistofnunar Íslands í Þjóðmenningarhúsinu Að spyrja Náttúruna – saga Náttúrugripasafnsins er nú lokið. Síðustu sýningarhelgina voru úrslit kynnt og verðlaun veitt í samkeppni stofnunarinnar um bestu teikninguna af tígrisdýri. Alls hlutu átta börn viðurkenningu í tveimur aldursflokkum; 6 til 7 ára og 8 ára og eldri.

Hrafnaþing 20. janúar: Árangur birkisáninga - dæmi frá Gunnarsholti á Rangárvöllum

Fri, 15 Jan 2010 02:50:21 +0000

Sigurður H. Magnússon gróðurvistfræðingur hjá Náttúrufræðistofnun flytur erindi sitt „Árangur birkisáninga - dæmi frá Gunnarsholti á Rangárvöllum“ á Hrafnaþingi miðvikudaginn 20. janúar.

Síðasta sýningarhelgi; Að spyrja Náttúruna - saga Náttúrugripasafnsins

Wed, 13 Jan 2010 11:07:24 +0000

Síðasta sýningarhelgi Að spyrja Náttúruna – saga Náttúrugripasafnsins er komandi helgi. Á sýningunni er að finna fjölda uppstoppaðra dýra frá öllum heimshornum auk annarra náttúrugripa og muna úr sögu Náttúrugripasafnsins, s.s. geirfuglinn, tígrisdýr, eðlur, froska, apa, kristalla, gróðursýni, og svo mætti lengi telja. Sýningin var sett upp í Þjóðmenningarhúsinu af Náttúrufræðistofnun Íslands í mars sl. til að minnast 100 ára afmælis starfsemi í Þjóðmenningarhúsinu en blómaskeið Náttúrugripasafnsins stóð yfir þá áratugi sem Safnahúsið, eins og húsið var gjarnan nefnt þá, hýsti starfsemina eða frá opnun hússins 1909 til ársins 1960.

Farflug kríunnar - hulunni svipt af lengstu ferðalögum dýra í heiminum

Tue, 12 Jan 2010 09:19:17 +0000

Í glænýrri grein í bandaríska vísindaritinu Proceedings of the National Academy of Sciences koma fram nýjar upplýsingar um farhætti kríunnar. Alþjóðlegur samstarfshópur vísindamanna, þ. á m. frá Íslandi, hafa komist að því að krían – þessi litli fugl sem er aðeins rúm 100 grömm að þyngd – flýgur meira en 70 þúsund kílómetra á árlegu farflugi póla á milli. Sumar kríur fljúga sem samsvarar þremur ferðum til tunglsins og til baka um ævina.

Náttúrufræðistofnun Íslands óskar samstarfsmönnum og landsmönnum öllum gleðilegra jóla og farsældar á komandi ári

Tue, 22 Dec 2009 02:12:02 +0000

Vetrarfuglar á Suðvesturlandi í 50 ár - hrun í svartbaksstofninum

Mon, 21 Dec 2009 04:38:28 +0000

Vetrarfuglar hafa verið taldir um jólaleytið í nær 60 ár eða frá 1952. Sjálfboðaliðar annast þessar talningar sem ná nú til um 150 svæða um land allt. Niðurstöður áranna 2002-2008 eru aðgengilegar á vef Náttúrufræðistofnunar Íslands. Á ráðstefnu Líffræðifélagsins í nóvember 2009 kynntu þau Guðmundur A. Guðmundsson, Svenja N.V. Auhage og Kristinn Haukur Skarphéðinsson langtímavísitölur fyrir 19 algengar fuglategundir á Suðvesturlandi (1959-2008) (sjá bls. 60). Þar kom m.a. fram að svartbaki hefur fækkað gríðarlega á þessum tíma. Hvítmáfi fjölgaði fram undir 1985 en hefur verið á stöðugri niðurleið síðan. Dílaskarfur og toppskarfur sveiflast í takt við talningar á varpstöðvum, sá fyrrnefndi hefur verið i vexti undanfarin ár en toppskarfi fækkar. Vaðfuglarnir sendlingur, tildra og stelkur hafa fylgst lengi að, en hefur ásamt tjaldi fækkað um helming í fjörum á Suðvesturlandi undanfarin sjö ár.

Skoffínið kveðið niður - minningargrein

Mon, 21 Dec 2009 01:51:56 +0000

Skoffín þekkja margir í merkingunni fífl eða kjáni og stundum sem gæluorð um börn. Svo eru til skoffín sem náttúrufyrirbrigði og er það skilgreint sem afkæmi refs og hundstíkur. Skuggabaldur er afkvæmi sömu dýra en kemur úr móðurkviði refsins og er hugtakið einnig notað yfir illan anda, myrkramann og læðupoka.

Aldurshlutföll rjúpu á veiðitíma 2009

Mon, 21 Dec 2009 11:31:31 +0000

Náttúrufræðistofnun hvetur rjúpnaskyttur til að klippa annan vænginn af rjúpum sem þær veiddu 2009 og senda stofnuninni. Af vængjunum má ráða hvort um er að ræða fugl á fyrsta ári eða eldri fugl. Fuglum af sama veiðisvæði eða úr sömu sveit þarf að halda saman í poka þannig að hægt sé að sundurgreina sýnin eftir landshlutum.

Vetrarfuglatalning 2009

Mon, 14 Dec 2009 03:35:53 +0000

Hin árlega vetrarfuglatalning sem Náttúrufræðistofnun Íslands hefur skipulagt frá 1952 fer að þessu sinni fram sunnudaginn 27. desember n.k. Markmið vetrarfuglatalninga er að safna upplýsingum um fjölda og dreifingu fugla að vetrarlagi.

Nýtt gróðurkort af Hrísey og útbreiðslu ágengra tegunda

Fri, 4 Dec 2009 11:37:46 +0000

Hjá Náttúrufræðistofnun Íslands er komin út ný skýrsla um gróðurfar í Hrísey og fylgir henni gróðurkort af eynni. Skýrslan er unnin fyrir Akureyrarbæ en vettvangsvinna hófst haustið 2007. Markmið með verkefninu var að fá yfirlit yfir gróðurfar í Hrísey og var sérstök áhersla lögð á að kortleggja útbreiðslu alaskalúpínu og skógarkerfils og fá þannig skýra mynd af framgangi þessara tegunda sem hafa breiðst hratt út í Hrísey á síðustu áratugum. Jafnframt væri hægt að spá fyrir um líklegar breytingar í framtíðinni. Auk gróðurkorta af Hrísey er útbreiðsla alaskalúpínu, skógarkerfils og ætihvannar rakin og birt á kortum í skýrslunni.

Bernarsamningurinn um vernd villtrar náttúru í Evrópu 30 ára. Aðildarríki orðin 50 að tölu og forstjóri Náttúrufræðistofnunar Íslands endurkjörinn forseti samningsins

Tue, 1 Dec 2009 05:08:59 +0000

Bernarsamningurinn um vernd villtra dýra og plantna og búsvæða þeirra í Evrópu var samþykktur og lagður fram til undirritunar í Bern í Sviss 19. september 1979. Í tilefni af þessu 30 ára afmæli samningsins var árlegur fundur aðildarríkjanna haldinn í Bern 23. – 26. nóvember sl. í boði svissnesku ríkisstjórnarinnar. Þetta var í fyrsta sinn í sögu samningsins að fundurinn er haldinn utan Evrópuráðsins í Strasbourg í Frakklandi þar sem hann er vistaður. Fundurinn, sem var vel sóttur af aðildarríkjum, áheyrnarríkjum og alþjóðlegum samningum og samtökum, markaði tímamót þar sem fjöldi aðildarríkja varð 50 ríki með aðild Bosníu-Herzegóvínu, Svartfjallalandi og Georgíu. Jón Gunnar Ottósson, forstjóri Náttúrufræðistofnunar Íslands og forseti samningsins setti fundinn og stýrði honum (opnunarávarp). Hann var einróma endurkjörinn í fundarlok að tillögu ríkja Evrópusambandsins. Fundurinn samþykkti sérstaka yfirlýsingu, The Bern Declaration, um framtíðaráherslur á sviði náttúruverndar í tengslum við ár Sameinuðu þjóðanna, 2010, um líffræðilega fjölbreytni.

Aldurshlutföll rjúpu á veiðitíma 2009

Tue, 1 Dec 2009 09:48:16 +0000

Náttúrufræðistofnun hvetur rjúpnaskyttur til að klippa annan vænginn af rjúpum sem þær veiða og senda stofnuninni. Af vængjunum má ráða hvort um er að ræða fugl á fyrsta ári eða eldri fugl. Fuglum af sama veiðisvæði eða úr sömu sveit þarf að halda saman í poka þannig að hægt sé að sundurgreina sýnin eftir landshlutum.

Mat á verndargildi 18 háhitasvæða - samantekt í Speglinum á RÚV

Fri, 20 Nov 2009 13:32:09 +0000

Eins og fram hefur komið á vef Náttúrufræðistofnunar er umfangsmiklum rannsóknum stofnunarinnar á náttúrufari og verndargildi háhitasvæða landsins lokið. Hægt er að nálgast skýrslur og annað efni tengt þessum rannsóknum á vef stofnunarinnar. Í gær var greinargóð samantekt um verkefnið kynnt í útvarpsþættinum Speglinum á RÚV þar sem Kristján Jónasson, jarðfræðingur hjá Náttúrufræðistofnun og einn helsti sérfræðingur þessara rannsókna, ræðir um verkefnið.

Mat á verndargildi 18 háhitasvæða

Fri, 13 Nov 2009 01:08:55 +0000

Náttúrufræðistofnun Íslands hefur lokið umfangsmiklum rannsóknum á náttúrufari og verndargildi háhitasvæða landsins, sem hófust árið 2005. Þetta er í fyrsta skipti að aflað er með skipulegum hætti heildstæðum upplýsingum um náttúrufar háhitasvæða, jarðfræði og lífríki, til að meta sérstöðu þeirra í íslenskri náttúru og náttúrufarsleg verðmæti. Niðurstöður verkefnisins eru birtar í fjórum skýrslum, ásamt fylgigögnum (kortum og myndum), sem er að finna á vef stofnunarinnar. Í matinu er Torfajökulssvæðið talið hafa hæst verndargildi, en eftirtalin svæði önnur hafa hátt verndargildi á heimsvísu: Reykjanes, Grændalur, Geysir, Torfajökull/Landmannalaugar, Askja, Leirhnjúkur og Gjástykki og Brennisteinsfjöll. Ljóst er að lítill munur er á verndargildi margra háhitasvæða landsins en þau eru öll fágæt á lands- og heimsvísu að mati Náttúrufræðistofnunar.

Hrafnaþing 2009-2010

Thu, 12 Nov 2009 01:21:21 +0000

Fyrsta erindi vetrarins á Hrafnaþingi Náttúrufræðistofnunar Íslands verður flutt miðvikudaginn 25. nóvember. Svenja Auhage, umhverfis- og vistfræðingur á Náttúrufræðistofnun, ríður á vaðið með erindið „Fuglalíf á endurheimtum vötnum á Vesturlandi“. Hægt er að nálgast dagskrá vetrarins á vef stofnunarinnar.

Aldurshlutföll rjúpu á veiðitíma 2009

Tue, 10 Nov 2009 02:25:53 +0000

Að spyrja Náttúruna - saga Náttúrugripasafnsins

Mon, 26 Oct 2009 11:45:06 +0000

Náttúrufræðistofnun minnir á sýningu sína „Að spyrja Náttúruna – saga Náttúrugripasafnsins“, sem stendur nú yfir í Þjóðmenningarhúsinu við Hverfisgötu. Sýningin segir sögu safnsins frá því það var stofnsett árið 1889 þar til því var lokað tímabundið fyrir almenningi árið 2008. Blómaskeið safnsins var á fyrstu áratugum 20. aldar þegar það var til húsa í Þjóðmenningarhúsinu, sem þá hét Safnahúsið.

Skógarmítill - blóðsuga sem ber með sér sýkla

Fri, 23 Oct 2009 02:06:57 +0000

Töluverð umfjöllun hefur verið í fréttum í dag um að einstaklingur hér á landi hafi sýkst af völdum skógarmítils. Skógarmítill er blóðsuga á spendýrum og getur borið sýkla sem valda alvarlegum sjúkdómum í mönnum og skepnum. Hann er nú að öllum líkindum orðinn landlægur en útbreiðsla hans hefur einmitt verið að færast norðar í allri Evrópu með hlýnandi loftslagi.

Yfirlit frjómælinga sumarið 2009

Mon, 12 Oct 2009 05:32:51 +0000

Frjómælingum fyrir árið 2009 er lokið. Í Reykjavík varð heildarfjöldi frjókorna 3911 sem er yfir meðallagi síðustu 20 ára en á Akureyri urðu frjókornin 2330 í rúmmetra lofts sem er um 14% undir meðallagi áranna 1998–2008.

Aðlaðandi pöddur

Mon, 28 Sep 2009 11:16:48 +0000

Annríkt var á bás Náttúrufræðistofnunar Íslands á Vísindavöku Rannís sem haldin var 25. september s.l. Þar kynnti stofnunin nýjan vef um pöddur. Sýndir voru lifandi spánarsniglar og pardussniglar, hægt var að skoða vorflugur, holugeitunga, mykjuflugur, birkivefara, járnsmið og trjákepp í víðsjá og börnin fengu með sér myndir til að lita og búa til óróa. Týrusporðdrekinn og tvö afkvæmi hans vöktu einnig mikla athygli. Myndasýning af pöddum var á skjá og veggir bássins voru prýddir pöddumyndum.

Jarðfræðikort af Íslandi í mælikvarða 1:600.000

Wed, 23 Sep 2009 11:04:49 +0000

Náttúrufræðistofnun Íslands hefur gefið út ný jarðfræðikort af Íslandi í mælikvarða 1:600.000, bæði berggrunnskort og höggunarkort. Kortin eru byggð á sambærilegum kortum í mælikvarða 1:500.000 útgefnum af Náttúrufræðistofnun Íslands 1998. Ekki er um nýja kortlagningu að ræða, en gerðar voru ýmsar lagfæringar og leiðréttingar. Kortin eru nú í mælikvarðanum 1:600.000, m.a. til þess að hægt sé að prenta þau á Íslandi.

Bernarsamningurinn 30 ára

Fri, 18 Sep 2009 16:02:04 +0000

Á morgun, 19. september, eru 30 ár liðin frá undirritun Bernarsamningsins um verndun villtra dýra og plantna og búsvæða í Evrópu. Meginmarkmið Bernarsamnings er að vernda evrópskar tegundir villtra plantna og dýra og vistgerða sem eru verndarþurfi að mati aðildarríkjanna, einkum þær sem þarfnast fjölþjóðlegrar samvinnu.

Segir af spánarsniglum

Fri, 18 Sep 2009 01:19:16 +0000

Spánarsniglar höfðu hægt um sig í þurrkunum framan af sumri og færri staðfestar tilkynningar hafa borist Náttúrufræðistofnun Íslands en búist var við. Þeir hafa þó skotið upp kolli á nýjum stöðum og tilgáta um að á þessu sumri mætti búast við verulegri fjölgun fékk nýlega byr undir báða vængi.

Ráðstefna um kortlagningu og vöktun gróðurs og landslags á norrænum slóðum

Tue, 15 Sep 2009 09:42:50 +0000

Dagana 16. til 18. september verður haldin ráðstefna á Hótel Örk um kortlagningu og vöktun gróðurs og landslags á norrænum slóðum "Mapping and Monitoring of Nordic Vegetation and Landscape". Að ráðstefnunni stendur Náttúrufræðistofnun Íslands ásamt nokkrum stofnunum á Norðurlöndum.

Frjómælingar á Akureyri og í Reykjavík í ágúst 2009

Fri, 11 Sep 2009 11:39:58 +0000

Heildarfjöldi frjókorna í ágústmánuði reyndist undir meðallagi bæði á Akureyri og í Reykjavík en heildarfjöldi frjókorna í Reykjavík í ágúst mældist sá fjórði minnsti á 22 árum. Frjótíma ársins virðist vera lokið.