Flóra

Nafnið flóra í íslensku er komið úr latínu (flora), og er þar fleirtöluorð yfir blóm, í eintölu flos. Í nútímamálum táknar flóra venjulega allar plöntur ákveðins landsvæðis, eða ákveðins tímabils jarðsögunnar. Þannig er flóra Íslands skrá yfir, eða bók sem fjallar um plöntur á Íslandi, tertierflóra fjallar um plöntur tertiertímabilsins. Í samsetningum er oft talað um eyjaflóru, strandflóru eða fjallaflóru, og er þá átt við plöntur í eyjum, á ströndinni eða plöntur sem vaxa uppi á fjöllum. Stundum er afmarkaður hluti flórunnar tekinn sérstaklega fyrir, t.d. fléttuflóra eða mosaflóra, sem fæst þá eingöngu við fléttur eða mosa.

Talið er að í íslensku flórunni séu á bilinu 5-6000 tegundir plantna í víðustu merkingu þess orðs, þ.e. blómplöntur, byrkningar, mosar, fléttur, sveppir og þörungar. Tveir þeir síðastnefndu eru um 2/3 af heildartölunni. Tegundasamsetning íslensku flórunnar sýnir mestan skyldleika við flóru Skandinavíu, síðan við Bretlandseyjar einkum Skotland, og loks Grænland. Töluverður mismunur er á flórunni eftir landshlutum sem ræðst einkum af mismunandi loftslagi. Landrænt og hafrænt loftslag ræður þar miklu, einnig hitastig, snjólega og hæð landsins yfir sjávarmáli.