20. maí 2010

Í Reykjavík mældust fyrstu birkifrjóin 13. maí. Frjótölur eru enn lágar en í hlýindum og þurrviðri sem spáð er um helgina má búast við háum frjótölum (um 100) sunnanlands þar sem birki vex. Þar sem súld og þokuloft helst eru frjótölur hins vegar lágar. Hér á landi er sjaldgæft að frjótölur birkis fari yfir 100.
Dregið hefur úr asparfrjóum í Reykjavík en þau fóru hæst í 39 frjó í rúmmetra þann 15. maí.

Á Akureyri mældust fyrstu asparfrjóin 7. maí og 12. maí fóru frjótölur aspar hæst í 22.
Birkifrjó voru ekki farin að mælast fyrir norðan á mánudag 17. maí en gætu hugsanlega farið að dreifast nú um hvítasunnuhelgina en þá er spáð hlýindum og þurrviðri í innsveitum fyrir norðan og austan.

Karlreklar á birki. Blómin eru ekki að fullu útsprungin en stutt í að frjókorn fari að dreifast út í loftið. Kvenreklarnir eru minna áberandi og standa uppréttir á greinunum.	Karlrekill á birki. Blómin eru útsprungin og frjókorn farin að dreifast út í loftið.