Rannsóknir í flokkunarfræði og vistfræði plantna

Flokkunarfræðirannsóknirnar á Náttúrufræðistofnun Íslands beinast að því að meta hvaða tegundir finnast á landinu. Þessar rannsóknir byggja á vísindasöfnum stofnunarinnar en þar eru varðveitt eintök til staðfestingar útbreiðslu og breytileika einstakra tegunda. Vísindasöfnin eru einnig grunnur rannsókna í þróunarsögu og flokkunarfræði einstakra tegundahópa og ættkvísla.

Staða þekkingar er afar mismunandi eftir plöntuhópum. Blómplöntur og byrkningar eru vel þekktar ef undan eru skildir tegundahópar sem erfitt er að greina s.s. túnfíflar, undafíflar og augnfrór. Mosar eru sömuleiðis vel þekktir en íslenskum mosum hefur Bergþór Jóhannsson gert skil í fjölritum Náttúrufræðistofnunar Íslands. Grænþörungar eru frekar illa þekktir en brún- og rauðþörungar eru betur þekktir. Hafrannsóknastofnunin hefur einkum sinnt rannsóknum á síðastnefndu hópunum. Sveppir eru misvel þekktir en best þekktu hóparnir eru hattsveppir og sveppir sem mynda fléttur.

Plöntuvistfræðirannsóknir miða m.a. að því að greina starfsemi gróðurfélaga og meta útbreiðslu þeirra, kortleggja gróðurfélög og vistgerðir og þróa aðferðir s.s. fjarkönnun, sem létta þessa vinnu.

Sviðsstjóri í grasafræði er Starri Heiðmarsson.