Skógvist
- Svæði og aðferðir
- Gróður
- Smádýralíf
- Fuglalíf
- Útgefið efni
Skógrækt er ung og vaxandi atvinnugrein en hún er einnig tómstundagaman fjölda fólks og því líklegt að skógrækt muni á næstu áratugum hafa umtalsverð áhrif á lífríki og ásýnd landsins. Þrátt fyrir aukin umsvif í skógrækt hefur komið fram að rannsóknir hefur vantað til að svara mikilvægum spurningum um áhrif skógræktar á lífríki og ásýnd lands.
 |
| Hér hefur sitkagreni verið plantað í mólendi í Skorradal. Þar sem skógur vex upp í landi sem þessu verða miklar breytingar á lífríki svæðisins. Ljósm. Ásrún Elmarsdóttir |
Árið 2002 var hafið verkefnið SKÓGVIST í samvinnu Skógræktar ríkisins, Náttúrufræðistofnunar Íslands og Landbúnaðarháskóla Íslands. Meginmarkmið verkefnisins er að kanna breytingar sem verða á lífríki, kolefnishringrás og jarðvegsþáttum mólendis við skógrækt og þegar birkiskógur vex upp. Rannsóknir fóru fram á Fljótsdalshéraði á Austurlandi og í Skorradal og Norðurárdal á Vesturlandi. Mælingar fóru fram í mólendi og misgömlum lerki-, stafafuru-, sitkagreni- og birkiskógum. Þannig var mögulegt að kanna framvindu lífríkis eftir aldri skóganna og hvort hún er mismunandi eftir trjátegundum. Rannsóknir á breytingum á gróðurfari og dýralífi hafa m.a. verið unnar af starfsmönnum Náttúrufræðistofnunar Íslands.