Mýraeldar

Í sinueldunum miklu sem geisuðu á Mýrum 30. mars - 1. apríl 2006 brann 73 km² landsvæði, en af því voru um 61 km² flóar og mýrar. Þetta eru mestu sinueldar sem þekktir eru á Íslandi.

Á fyrsta degi breiddust eldarnir mjög hratt út undan norðaustan strekkingi og fóru frá upptökum um 14 km leið yfir mýraflóa fram til sjávar á liðlega fjórum klukkustundum. Áætlað er að meðalhraði eldtungunnar hafi verið um 3,2 km á klukkustund. Vindur var hægari á svæðinu 31. mars, dofnuðu þá eldarnir og tök náðust á útbreiðslu þeirra. Þann 1. apríl herti vind að nýju og gusu eldar þá upp aftur á suðurhluta brunasvæðisins en með slökkviaðgerðum tókst að komast fyrir þá er vind hægði seinni hluta dagsins. Gögn frá gervitunglum sem fóru nokkrum sinnum yfir landið meðan eldarnir brunnu hafa gefið góða mynd af útbreiðslu og orkulosun frá eldunum.

Mestu sinueldar á Íslandi?

Gróskumikill votlendisgróður einkenndu Mýrarnar. Hér má sjá starfsmenn NÍ við gróðurrannsóknir þar vestra á árinu 1997. Sú kortlagningin auðveldaði frekari rannsóknir á svæðinu eftir sinubrunan. Ljósm. Guðm. Guðjónsson.

Sérfræðingar Náttúrufræðistofnunar fóru vestur á Mýrar strax og sinueldarnir höfðu kulnað laugardaginn 1. apríl til kortleggja umfang brunans og leggja drög að rannsóknum á áhrifum eldanna á lífríkið. Sigríður Anna Þórðardóttir, umhverfisráðherra fól Náttúrufræðistofnun það verkefni og er reiknað með að stofnunin fylgist náið með framvindu gróðurs og dýralífs þar á næstu árum.

Ár liðið frá Mýraeldum

Þann 30. mars 2007 var ár liðið frá því að hinir miklu sinueldar komu upp á Mýrum. Mýraeldar voru líkastir náttúruhamförum og stóð mikil barátta við að hemja útbreiðslu þeirra og koma í veg fyrir að þeir grönduðu mannvirkjum og búpeningi á Mýrum. Slökkvistarf tókust giftusamlega og lítið sem ekkert eignatjón varð í eldunum.

Mosabruni á Miðdalsheiði 2007

Laugardaginn 23. júní 2007 brunnu 8,9 hektarar lands á Miðdalsheiði ofan Reykjavíkur. Þar er víðáttumikil mosaþemba með stinnastör og krækilyngi og var svæðið heilbrunnið og gróður illa farinn. Mosinn sem myndar mosaþembuna nefnist hraungambri Racomitrium lanuginosum og vex hann afar hægt. Líklegt er að það taki mörg ár fyrir hann að mynda samfellda breiðu á nýjan leik. Áform eru uppi um að fylgjast með framvindu gróðurs á brunasvæðinu á næstu árum.

Sinubruni á Skarðsströnd í apríl 2008

Mikill sinueldur kom upp 16. apríl á jörðunum Krossi og Frakkanesi á Skarðsströnd og stóð fram á næsta dag. Kortlagning og flatarmálsmæling á svæðinu sýndi að heildarstærð landsins sem brann var 1,05 km². Á eftir sinueldunum miklu á Mýrum 2006 er sinubruninn á Skarðsströnd 2008 einhver sá mesti sem þekktur er hér á landi undanfarna áratugi.
Mýrlendi var ríkjandi á brunasvæðinu og hafði sinueldurinn þar lítil varanleg áhrif. Mestu skemmdirnir voru hins vegar á lynggróðri á holtum og móum með sjónum.

Mosabruninn við Helgafell í júlí 2009

Starfsmenn Náttúrufræðistofnunar hafa kannað svæðið þar sem eldur kom upp í mosavöxnu hrauni í landi Hafnarfjarðar þann 22. júlí 2009. Farið var með brunasvæðinu og útlínur þess kortlagðar. Svæðið, sem er um tvo km austur af Helgafelli, liggur við Selvogsgötu þar sem hún fer um Þríhnúkahraun. Líklegt er að eldsupptök megi rekja til glóðar frá tóbaki göngumanns sem hefur átt leið um götuna. Bruninn er lítill en heildarflatarmál svæðisins reyndist vera tæpur hálfur hektari (4345 m²). Hraunið er mjög úfið þar sem eldurinn kom upp og hefur hann því breiðst fremur hægt um það. Slökkvistarf tókst jafnframt vel og skipti þar sköpum dreifing vatns úr þyrlu yfir svæðið.

Sinueldar við Hafnarfjörð í apríl 2008

Starfsmenn Náttúrufræðistofnunar fóru 29. apríl 2008 um svæði við Hafnarfjörð þar sem sinueldar höfðu komið upp undangengna daga og slökkvilið þurft að berjast við. Gengið var með stærstu brunaflekkjunum og útlínur þeirra kortlagðar með GPS-mælingum. Svæði það sem brann aðfararnótt 29. apríl við Kjóadal suðaustan Hvaleyrarvatns er langstærst að flatarmáli eða tæpir 8 hektarar. Í hlíðinni norðan við vatnið kom upp eldur 27. apríl og fór um svæði sem er um 1 hektari. Vestan vatnsins er annar minni blettur út með hlíðinni og reyndist hann hálfur hektari að stærð.