Hættuflokkar (IUCN)
Hættuflokkar Alþjóðanáttúruverndarsamtakanna (IUCN)
Árið 2001 gáfu Alþjóðanáttúruverndarsamtökin (IUCN)* út endurskoðaða staðla og leiðbeiningar fyrir gerð válista og eru þau viðmið nú notuð við gerð válista yfir íslenskar lífverur. IUCN-kerfið nýtur almennrar viðurkenningar og er notað mjög víða. Matskerfinu má beita á undirtegundir, tegundir, ættkvíslir og ættir lífvera á jörðinni í heild, en einnig til að flokka lífverur tiltekinna svæða eða einstakra landa eins og hér er gert. Tegundum er síðan skipað í sjö(9?) skilgreinda áhættuflokka eftir ástandi þeirra. Í íslenska válistanum er tegund og tegundir, í stað taxon, ft. taxa, sem tekur til allra áðurnefndra flokkunareininga.
Útdauð í náttúrunni (Extinct in the wild - EW)
Tegund telst vera útdauð í náttúrunni þegar hún lifir hvergi villt svo vitað sé heldur aðeins í ræktun eða í haldi, eða sem ílendur stofn/stofnar fjarri fyrri útbreiðslusvæðum. Tegund telst útdauð í náttúrunni þegar ekki finnst einn einasti einstaklingur hennar við ítarlega leit á þekktum eða líklegum búsvæðum á öllu útbreiðslusvæði hennar. Leita verður á þeim tíma sem samræmist lífsferli og lífmynd tegundarinnar.
Útdauð á svæði (Regionally Extinct - RE)
Tegund telst vera útdauð á svæði þegar enginn vafi leikur á því að síðasti einstaklingurinn sem hugsanlega er fær um að fjölga sér innan landsins (svæðisins) hefur dáið eða horfið af landinu (svæðinu).
Í bráðri hættu (Critically endangered - CR)
Tegund telst vera í bráðri hættu þegar eindregnar líkur eru á að hún verði útdauð í náttúrunni í náinni framtíð samkvæmt tilteknum forsendum.
Í hættu (Endangered - EN)
Tegund telst vera í hættu, en þó ekki í bráðri hættu, þegar mjög miklar líkur eru á að hún verði útdauð í náttúrunni í fyrirsjáanlegri framtíð, samkvæmt tilteknum forsendum.
Í yfirvofandi hættu (Vulnerable - VU)
Tegund telst vera í yfirvofandi hættu, en þó hvorki í bráðri hættu né í hættu sbr. hér að framan, ef miklar líkur eru á að hún verði útdauð í náttúrunni í framtíðinni samkvæmt tilteknum forsendum.
Ekki háðar vernd (Near threatened - NT)
Tegundir sem eru ekki háðar verndaraðgerðum, en eru nálægt því að flokkast í yfirvofandi hættu.
Aðrar tegundir (Least concern - LC)
Tegundir sem falla í hvorugan undirflokkinn hér að framan. Útbreiddar og algengar tegundir teljast til þessa flokks.
Upplýsingar ófullnægjandi (Data deficient - DD)
Tegund fellur í þennan flokk þegar upplýsingar um útbreiðslu hennar og stofnstærð eru ekki nægilegar til þess að hægt sé að meta hvort hún sé í útrýmingarhættu. Þrátt fyrir það getur lífsferill hennar verið vel þekktur að öðru leyti. Þetta er því ekki flokkur fyrir tegundir sem er ógnað eða teljast vera í nokkurri hættu.
Ekki metin (Not evaluated - NE)
Tegund telst ekki hafa verið metin ef ekki hefur ennþá verið beitt við matið þeim skilgreiningum og aðferðum sem hér hefur verið lýst.