Steindafrímerki

Frímerki með myndum af íslenskum steindum gefin út í fyrsta sinn

• Íslandspóstur gaf 1998-1999 út fjögur frímerki með myndum af dæmigerðum íslenskum steindum. Þetta eru einu frímerkin af þessu tagi sem út hafa komið hér á landi. Fjögur sýni í steindasafni Náttúrufræðistofnunar Íslands voru valin sem fyrirmynd, sýni af skólesíti, stilbíti og heulandíti frá Teigarhorni í Berufirði, og sýni af kalsíti (silfurbergi) frá Helgustöðum í Reyðarfirði.
• Ísland hefur um aldir verið frægt fyrir fallega seólíta (geislasteina), einkum skólesít, stilbít og heulandít. Þá er að finna í holum og sprungum í gömlum berglögum, einkum á Austfjörðum. Teigarhorn er þekktastur fundarstaða seólíta hér á landi.
• Skólesít (CaAl₂Si₃O₁₀ . 3H₂O) myndar ferstrenda, aflanga, glergljáandi kristalla, hvíta eða hálfgæra. Kristallarnir vaxa margir saman og geisla út frá einum punkti. Þeir geta orðið 12 cm langir. Stilbít (NaCa₂Al₅Si₁₃O₃₆ . 14H₂O) myndar flata, hvíta, kristalla með skelplötugljáa á hliðum. Kristallarnir breikka gjarnan og gildna til endanna og mynda knippi. Þeir geta orðið 7 cm langir. Heulandít (CaNaAl₄Si₁₅O₃₆ . 12H₂O) myndar einnig flata, hvíta, eða hálfglæra, kristalla með skelplötugljáa á hliðum. Kristallarnir mynda oft knippi. Stakir kristallar geta orðið allt að 10 cm á lengd.
• Annar frægur fundarstaður steinda á Íslandi er Helgustaðir í Reyðarfirði. Þar hefur fundist tært afbrigði af kalsíti (CaCO₃), sem nefnist silfurberg. Kalsít myndar oft tígulforma "scalenohedron"-kristalla. Stærsti kristallinn sem fundist hefur á Helgustöðum er um 60 cm á lengd. Námuvinnsla á silfurbergi hófst á Helgustöðum á sautjándu öld og stóð fram á tuttugstu öld.

Heulandít frá Teigarhorni.	Kalsít frá Helgustöðum.