Steindir á Íslandi
Steindir eru skilgreindar sem náttúrulegt, einsleitt, fast efni með ákveðna efnasamsetningu og skipulega röðun frumeinda, yfirleitt myndað í ólífrænum ferlum. Berg er oftast samsett úr mismunandi steindum, en getur einnig innihaldið gler, sem er myndlaust fast efni.
Hér verður hægt að nálgast stutta lýsingu á helstu einkennum steinda á Íslandi og skoða myndir af þeim. Listinn er ekki tæmandi en stefnt er að því að bæta inn tegundum jafnt og þétt.
Flokkun steinda
Steindir má flokka á ýmsa vegu. Til dæmis má skipta steindum í „frumsteindir“ og „síðsteindir“. Frumsteindir myndast við storknun bergkviku þegar bergið verður til. Síðsteindir myndast við ummyndun bergsins. Dæmi um slíkt eru seólítar sem falla út í holum og sprungum í berginu þegar heitt vatn leikur um það.
Í steindafræðinni eru steindir flokkaðar eftir kristalbyggingu og efnasamsetningu. Hér er stuðst við flokkunarkerfi Strunz (Strunz og Nickel, 2001). Þar er steindum skipað í 10 flokka (class) eftir samsetningu (tegund anjóna). Þeim er síðan skipt í deildir (division), undirdeildir (subdivision) og hópa (group) eftir kristalbyggingu og samsetningu. Sumum hópum er skipað saman í fjölskyldur (family). Sumar steindir má síðan flokka í mismunandi afbrigði (variety).
Hóparnir eru táknaðir með númeri. t.d. 09. FA. 25
09: Flokkur, Siliköt
F: Deild, Grindsiliköt án seólítísks vatns
A: Undirdeild, Grindsiliköt án aukaanjóna
25: Hópur, Plagíóklas feldspöt
Í plagíóklas hópnum eru eftirfarandi steindir:
Albít (há), Albít (lág), Oligoklas, Andesín, Labradorít, Bytownít, Anortít og Reedmergnerít.
Plagíóklas feldspöt tilheyra svo feldspat-fjölskyldunni ásamt alkalí feldspötum 09.FA.20
Steindafylki
Steindir sem finnast saman í bergi, myndaðar við sömu aðstæður og í jafnvægi hver við aðra.