Saga steinasafnsins

Vísindasöfn Náttúrufræðistofnunar Íslands eiga rætur sínar að rekja til Náttúrugripasafns Hins íslenska náttúrufræðifélags, sem stofnað var til árið 1889. Það hefur frá byrjun verið meðal helstu verkefna Náttúrugripasafnsins, og síðar Náttúrufræðistofnunar Íslands, að koma upp og viðhalda fullkomnu safni íslenskra náttúrugripa, þar á meðal steina.

Mjög lítið barst af steinum í safnið fyrstu áratugina, en umtalsverð breyting varð þegar Sigurður Þórarinsson, jarðfræðingur, var ráðinn að Náttúrugripasafninu 1947, sama ár og ríkið tók við rekstri þess. Fyrsti skerfur Sigurðar til steinasafnsins var ágætt safn bergsýna úr Heklugosinu 1947-1948. Skipuleg söfnun steina hófst 1970, ári eftir að fyrsti steinafræðingurinn hóf störf hjá stofnuninni. Steinasafnið hefur vaxið jafnt og þétt undanfarna þrjá áratugi. Þess má geta, að það var ekki fyrr en um 1975-1976, sem Náttúrufræðistofnun náði því marki að ráða yfir besta íslenska steinasafninu, fram að þeim tíma var safn Geologisk Museum við Kaupmannahafnarháskóla sennilega bæði stærra og betra að gæðum. Í steinasafni Náttúrufræðistofnunar í Reykjavík voru 22.383 steinasýni í lok árs 2006.