Stafrænar gagnaskrár steinasafnsins

Steinasafnið er skráð í gagnagrunn Jarðfræðisviðs Náttúrufræðistofnunar Íslands og stefnt er að því að gera það aðgengilegt í gagnavefsjá stofnunarinnar.

Skráning steinasafnsins í stafrænar gagnaskrár hófst árið 1990. Meginskráin kallast „Steinasafn“. Þar eru skráð öll steinasýni sem varðveitt eru á Náttúrufræðistofnun Íslands í Reykjavík; í lok árs 2006 voru þau 22.383 alls. Allar ritaðar heimildir eru skráðar í svokallaða „Ritaskrá“. Þar eru skráðar heimildir um bergfræði, steindafræði og jarðefnafræði Íslands sem birst hafa síðan 1840, alls 2.907 rit. Unnið er að skráningu upplýsinga um bergmyndanir frá nútíma og síðkvarter. Með bergmyndun er átt við þau gosefni sem komið hafa upp í einu eldgosi eða hafa myndast í einu innskoti. Búið er að skrá 1.395 bergmyndanir. Eldstöðvakerfi (megineldstöðvar) eru skráð á svipaðan hátt. Skráðar hafa verið upplýsingar um 150 eldstöðvakerfi frá öllum tímaskeiðum í jarðsögu Íslands og landgrunnsins. Hafin er vinna við að skrá fundarstaði steinda á svipaðan hátt og gert er með bergmyndanir. Ýmsar greiningar eru skráðar sérstaklega í mismunandi skrár. Skráning bergefnagreininga af íslensku bergi er lengst á veg komin en skráðar hafa verið 4.145 slíkar.