Um hvítabirni og komur þeirra til Íslands

Karl Skírnisson.

Karl Skírnisson, dýrafræðingur á Tilraunastöðinni á Keldum, flytur erindi sitt um hvítabjarnarkomur á Íslandi, á Hrafnaþingi miðvikudaginn 11. apríl kl. 15:15.

Í erindinu verður fjallað um hvítabirni og komur þeirra til Íslands. Greint verður frá niðurstöðum krufninga á fjórum dýrum sem synt hafa hingað til lands á undanförnum fjórum árum. Fimmta dýrið til umfjöllunar er björn sem aflífaður var við hafísjaðarinn norður af landinu í sumarbyrjun 1993. Rannsóknirnar hafa meðal annars beinst að athugunum á kynþroska, ásigkomulagi og aldri. Þá hefur leit verið gerð að sníkjudýrum og fannst tríkínan Trichinella nativa í vefjum tveggja bjarnanna. Uppruni fæðuleifa í meltingarvegi var einnig greindur. Sýni hafa verið tekin úr dýrunum fyrir erlenda samverkamenn, til dæmis til mælinga á eiturefnum og til að kanna skyldleika hvítabjarna innan Austur-Grænlandsstofnsins sem og tengsl við aðliggjandi stofna. Að endingu eru nefndar mögulegar ástæður þess að hvítabirnir yfirgefa náttúruleg heimkynni sín við Austur Grænland og leggja í ferðalög sem ávallt hafa reynst vera feigðarflan þegar stefnan var tekin á Ísland.

Birt var grein í Náttúrufræðingnum, Um aldur og ævi hvítabjarna, eftir Karl Skírnisson (pdf, 6,16 MB).

Hvassar klær eru nauðsynlegar þegar hremma á sel en selir eru langmikilvægasta fæðuuppspretta hvítabjarna. Ljósm. Karl Skírnisson.	Hægt er að ráða í lífssögu hvítabjarna með því að skoða þunnsneiðar úr tannrótum. Ljósm. Karl Skírnisson.
Þorvaldur Þór Björnsson og Karl Skírnisson við skrokk af hvítabirni. Ljósm. Karl Skírnisson.