Válisti 1 - Plöntur
Náttúrufræðistofnun Íslands gaf út fyrsta hluta íslensks válista: Válista 1–Plöntur árið 1996. Í honum er gerð grein fyrir hættuflokkum Alþjóða náttúruverndarsamtakanna IUCN og birtir listar yfir a) blómplöntur og byrkninga, b) fléttur, c) mosa og d) þörunga í samræmi við þá flokkaskipan, alls 235 tegundir. Enn fremur eru birtar leiðbeiningar við mat og röðun í hættuflokkana og skrá yfir friðlýstar plöntutegundir á Íslandi.
Válisti 1 - Plöntur er 82 bls. að stærð, með 158 útbreiðslukortum, 21 ljósmynd af háplöntum og fléttum, eftir Eyþór Einarsson, Hörð Kristinsson og Kristbjörn Egilsson og 15 teikningum af mosum eftir Bergþór Jóhannesson. Höfundar efnis eru Eyþór Einarsson, Hörður Kristinsson, Bergþór Jóhannsson, Náttúrufræðistofnun Íslands og Karl Gunnarsson, Hafrannsóknastofnuninni. 82s.
Hægt er að panta válistann með að senda tölvupóst á bokasafn@ni.is en hann er einnig til sölu á skrifstofum Nátttúrufræðistofnunar í Reykjavík og á Akureyri og kostar 1000 krónur.
Endurskoðun á válistaflokkun háplantna var gerð árið 2008. Alls voru 79 tegundir metnar samkvæmt nýjustu skilyrðum IUCN (Alþjóða náttúruverndarsamtakanna) sem samþykkt voru árið 2000 en þau skilyrði eru nokkuð breytt frá þeim skilyrðum sem giltu þegar fyrsta útgáfa válistans kom út.