Breiðbobbi - Oxychilus draparnaudi (Beck, 1837)

Fylking: Mollusca Flokkur: Gastropoda Ættbálkur: Pulmonata  Ætt: Oxychilidae

Breiðbobbi, 9 mm. ©EÓ[Smellið á mynd til að stækka]

Útbreiðsla
Talinn eiga uppruna að rekja til Miðjarðarhafslanda. Dreifðist þaðan fyrr á öldum norður eftir V-Evrópu til Bretlandseyja og suðurhluta Skandinavíu. Einnig barst hann yfir til N-Ameríku og Nýja-Sjálands.

Ísland
Höfuðborgarsvæðið; Reykjavík, Kópavogur, Hafnarfjörður.

Lífshættir
Í upprunalegum heimkynnum finnst breiðbobbi í náttúrulegu umhverfi, undir steinum, lauslegum hlutum og í föllnu laufi á rökum, skuggsælum stöðum í skógum, einnig í hræjum og á sjávarklettum. Norðar er hann háðari mannlegu umhverfi og finnst þar fyrst og fremst í görðum. Hér á landi lifir breiðbobbi í húsagörðum, undir laufi, steinum og lausum hlutum á rökum stöðum. Hann hefur alloft fundist í holum við geitungabú þar sem halla undan búskapnum. Deyjandi lirfur sem þernur eru hættar að þjónusta virðast þær eftirsóknaverð fæða breiðbobbans. Breiðbobbi er nefnilega fyrst og fremst kjötæta en ekki plöntuæta eins og flestir sniglar.

Almennt
Ísland er nyrsti fundarstaður breiðbobba í heiminum. Hann fannst fyrst við Tjörnina í Reykjavík 1965, var lengi vel staðbundinn þar um slóðir og fannst ekki fyrr en síðar í görðum víðar á höfuðborgarsvæðinu. Gerð hefur verið ítarleg grein fyrir breiðbobbanum á öðrum vettvangi (sjá heimildir).

Breiðbobbi er stærstur nokkurra nauðalíkra og náskyldra tegunda. Trjóna hálfgljáandi kuðungsins er flöt og snigillinn er blár á lit.

Heimildir

Árni Einarsson 1977. Íslenskir landkuðungar. Náttúrufræðingurinn 47: 65–128.

Páll Einarsson 2006. Breiðbobbinn (Oxychilus draparnaudi (Beck, 1837)) endurfundinn á Íslandi. Náttúrufræðingurinn 74: 121–123.

Pfleger, V. & J. Chatfield 1988. A Guide to Snails of Britain and Europe. Hamlyn, England. 216 bls.

©Erling Ólafsson, 27. janúar 2010.

Allir sniglar | Allar pöddur | Íslenska fánan