Kjarrvefari - Apotomis sororculana (Zetterstedt, 1840)

Fylking: Arthropoda Flokkur: Insecta Ættbálkur: Lepidoptera Ætt: Tortricidae

Kjarrvefari. 10 mm. ©EÓ[Smellið á mynd til að stækka]

Útbreiðsla
N- og M-Evrópa og austur eftir Síberíu.

Ísland
Láglendi um land allt, fundinn hæst yfir sjó við Blöndulón.

Lífshættir
Kjörlendi kjarrvefara eru birkiskógar og birkikjarr. Fiðrildin fara að skríða úr púpum viku af júní og fljúga í mestum mæli í júní og júlí. Þau eru fáséð í ágúst og eintak sem fannst 1. september er að öllum líkindum af 2. kynslóð en það er óvenjulegt. Lirfurnar nærast á birkilaufum sem þær spinna saman og fullvaxnar, þegar líður að hausti, púpa þær sig á milli laufblaðanna sem síðan falla til jarðar. Púpurnar brúa veturinn til næsta vors.

Almennt
Kjarrvefari er frekar sjaldgæfur hér á landi þó hann sé útbreiddur en venjulega verður aðeins vart við einstök fiðrildi á flögri í birkiskógunum. Hann telst því ekki til skaðvalda á birki. Kjarrvefari þekkist frá öðrum vefurum á stórum hvítum blettum utarlega á framvængjum.

Heimildir

Bradly, J.D., W.G. Tremewan & A. Smith 1979. British Tortriciod Moths. Tortricidae: Olethreutinae. The Ray Society, London. 336 bls.

Hálfdán Björnsson 1968. Íslensk fiðrildi í skógi og runnum. Ársrit Skógræktarfélags Íslands 1968: 22–25.

Wolff, N.L. 1971. Lepidoptera. Zoology of Iceland III, Part 45. Munksgaard, Kaupmannahöfn. 193 bls.

©Erling Ólafsson, 14. ágúst 2009

Öll fiðrildi | Allar pöddur | Íslenska fánan