Kóprabjalla - Necrobia rufipes (De Geer, 1775)

Fylking: Arthropoda Flokkur: Insecta Ættbálkur: Coleoptera Ætt: Cleridae

Kóprabjalla. 6 mm. ©EÓKóprabjalla. 6 mm. ©EÓ [Smellið á myndir til að stækka]

Útbreiðsla
Um heim allan.

Ísland
Fágætur slæðingur. Reykjavík (um 1950, 1973), Kópavogur 2009.

Lífshættir
Fullorðnar bjöllur og lirfur nærast á sömu fæðu og er hún afar fjölbreytt. Þær leggjast á fæðuna utan frá en naga sig ekki inn í hana. Kóprabjalla étur fæðu bæði úr plöntu- og dýraríkinu, en ef hún kemst í kjötmeti verpir hún fleiri eggjum og þroskatíminn styttist. Bjöllurnar leggjast á uppþornuð hræ sem þær naga og sækja mjög í ýmsar aðrar afurðir dýrakyns eins og þurrkaðan fisk, fiskimjöl, kjötmjöl, bein og beinamjöl, gúanó og jafnvel egypskar múmíur. Auk þess veiða þær önnur smádýr, jafnvel lirfur og púpur af eigin tegund. Fullorðnar bjöllur eru langlífar, geta lifað í allt að 14 mánuði. Við góð skilyrði við stofuhita ná þær fullorðinsstigi á um 36 dögum.

Almennt
Kóprabjalla er tilfallandi og fágætur slæðingur hérlendis. Tilfelli frá Kópavogi 2009 tengist innfluttum hundamat. Óþekktar lirfur fundust í poka um tveim mánuðum áður en fullorðnar bjöllur fóru að finnast skríðandi á gólfum heimilisins í nokkrum mæli.

Heimildir

Åkerlund, M. 1991. Ängrar – finns dom ...? Om skadeinsekter i museer och magasin. Naturhistoriska riksmuseet og Svenska museiföringen, Stokkhólmi. 207 bls.

Larsson, S.G. & Geir Gígja 1959. Coleoptera 1. Synopsis. Zoology of Iceland III, Part 46a. Munksgaard, Kaupmannahöfn. 218 bls.

©Erling Ólafsson, 14. ágúst 2009

Allar bjöllur | Allar pöddur | Íslenska fánan

Til baka, , Prenta greinina