Vínekrubobbi - Eobania vermiculata (Müller, 1774)
Fylking: Mollusca Flokkur: Gastropoda Ættbálkur: Pulmonata Ætt: Helicidae
 |
|
Vínekrubobbi 12 mm. ©EÓ |
Útbreiðsla
Allt umhverfis Miðjarðarhaf og á eyjum þar í hafi, Litla-Asía, Krímskagi.
Ísland
Tveir fundarstaðir, Selfoss og Aðaldalur.
Lífshættir
Vínekrubobbi fannst upphaflega á grassteppum en finnst nú einna helst á ekrum, í görðum og vegköntum, í gróðurþykkni allskonar og á vínekrum.
Almennt
Vínekrubobbi er fágætur slæðingur á Íslandi sem fannst í tvígang með stuttu millibili haustið 2009, þ.e. á Núpum í Aðaldal 1. október og við Selfoss átta dögum síðar eða 9. október. Báðir bobbarnir fundust í vínberjaklösum. Því má líklegt telja að þeir hafi borist til landsins með sömu sendingunni frá S-Evrópu. Vínekrubobbi er sannarlega augnakonfekt, einn af allnokkrum röndóttum bobbum af brekkubobbaættinni (Helicidae). Kuðungurinn er tiltölulega flatur, þ.e. með lága strýtu. Skelröndin umhverfis munnann er þunn á báðum bobbunum sem hingað bárust og merkir að um ungviði sé að ræða. Á fullmótuðum kuðungum er röndin þykk og útsveigð, hvít á lit. Grunnlitur skeljarinnar er kremaður. Spíralrendurnar eru fimm að grunni til en geta runnið saman og verið slitróttar.
Heimildir
Pfleger, V. & J. Chatfield 1988. A Guide to Snails of Britain and Europe. Hamlyn, England. 216 bls.
©Erling Ólafsson, 16. nóvember 2009
Allir sniglar | Allar pöddur | Íslenska fánan