Baugabobbi - Cepaea nemoralis (Linnaeus, 1758)
Fylking: Mollusca Flokkur: Gastropoda Ættbálkur: Pulmonata Ætt: Helicidae
 |
|
Baugabobbi. Breidd kuðungs 25 mm. ©EÓ |
Útbreiðsla
V- og M-Evrópa, með ströndum Skandinavíu og Eystrasalts til Litháens og Lettlands; Þýskaland, Tékkland, Ungverjaland, á Balkanskaga til Bosníu. Hefur borist með mönnum til nýrra heimkynna, m.a. í N-Ameríku.
Ísland
Fjórir fundarstaðir; Heiðmörk, Kópavogur, Keflavík og Patreksfjörður.
Lífshættir
Kjörlendi baugabobba er í skógum og gróðurþykkni, í limgerðum, görðum, brekkum og á grassteppum, nær hátt til fjalla í Ölpunum og Pýreneafjöllum. Hann nærist á plöntum en virðist ekki valda skaða sem telur.
Almennt
Baugabobbi er fágætur slæðingur til landsins með varningi. Alls er kunnugt um fimm tilvik. Hann fannst fyrst í október 1991 og hafði borist ásamt fleiri kvikindum með stálvörum frá Ítalíu til framkvæmda í Heiðmörk. Í maí 2005 fannst einn sem hafði komið sér fyrir utan á hurð innflutningsfyrirtækis í Kópavogi. Þriðja tilvikið er frá Patreksfirði en þá var um að ræða tvo snigla sem bárust þangað með lausum frystieiningum frá Danmörku. Baugabobbi í garði í Grafarvogi í Reykjavík í júní 2008 er fjórða skráða tilvikið og enn annar fannst á lager hjá BYKO í Keflavík í júlí sama ár. Ekki eru líkur til þess að tegundin setjist hér að í bráð. Baugabobbi hefur einnig slæðst til Færeyja (maí 2009). Kuðungur baugabobba er einkar fallegur, gulur með brúnu spíralbelti og jaðar munnans er einnig brúnn.
Heimildir
Jensen, J.-K. 2009. Insekter og andre dyr: Cepaea nemoralis. www.jenskjeld.info/DK_side/indexdk.htm [skoðað 7.8.2009].
Pfleger, V. & J. Chatfield 1988. A Guide to Snails of Britain and Europe. Hamlyn, England. 216 bls.
©Erling Ólafsson, 16. nóvember 2009
Allir sniglar | Allar pöddur | Íslenska fánan