Bernarsamningurinn
Bernarsamningurinn um vernd plantna og dýra og búsvæða þeirra í Evrópu var gerður árið 1979 og staðfestur hér á landi árið 1993. Samningurinn, sem vistaður er hjá Evrópuráðinu, nær nú til 45 ríkja, flestra í Evrópu. Samningurinn hefur haft mikil áhrif á náttúruverndarlöggjöf aðildarríkjanna og framkvæmd hennar og það hvernig staðið er að því að skrá, flokka, meta og vakta lifandi náttúru.
Náttúrufræðistofnun sækir fundi aðildarríkja samningsins fyrir hönd Íslands og hefur tekið þátt í störfum undirnefnda sem mikilvægar eru fyrir landið. Þar á meðal má nefna sérfræðinganefnd samningsins um net náttúruverndarsvæða, nefnd um ágengar innfluttar tegundir, nefnd um jarðminjar, nefnd um hryggleysingja, nefnd um veiðar og lífríki og nefndir um verndaráætlanir fyrir einstakar fuglategundir. Forstjóri Náttúrufræðistofnunar, Jón Gunnar Ottósson, er formaður Bernarsamningsins og situr í þriggja manna stjórn hans. Hann situr jafnframt í stjórn náttúruverndarnefndar Evrópuráðsins. Ýmsir starfsmenn stofnunarinnar sækja fundi undirnefnda.
Evrópskur sáttmáli um veiðar og líffræðilega fjölbreytni
Bæklingurinn Evrópskur sáttmáli um veiðar og líffræðilega fjölbreytni (European Charter on Hunting and Biodiversity) er gefinn út á vegum Evrópuráðsins og fastanefndar Bernarsamningsins um vernd plantna og dýra og búsvæða þeirra í Evrópu. Sáttmálinn er útfærsla á samþykkt fastanefndar Bernarsamningsins nr. 128 um veiðar og líffræðilega fjölbreytni.
Framangreindur sáttmáli byggir á skyldum og reglum Bernarsamningsins og samningsins um vernd líffræðilegrar fjölbreytni. Sáttmálinn á rætur sínar að rekja til grundvallarreglu samningsins um líffræðilega fjölbreytni um sjálfbæra þróun/nýtingu eins og hún er útskýrð í svokallaðri Addis Ababa samþykkt og í Malawi samþykkt um vistfræðilega nálgun. Aðildarríki Bernarsamningsins ákváðu að í þessum sáttmála skyldi lögð áhersla á atriði sem ekki er fjallað um á öðrum vettvangi. Undir þetta falla veiðar, veiðar og ferðaþjónusta, viðmiðanir um kröfur og staðla fyrir evrópska veiðimenn þ.á m. um fræðslu, almenna þekkingu og öryggismál. Sáttmálinn inniheldur 12 meginreglur og 47 leiðbeiningar fyrir eftirlits- og framkvæmdaraðila með líffræðilegri fjölbreytni. Jafnframt inniheldur sáttmálinn 59 leiðbeiningar fyrir veiðimenn og ferðaþjónustuaðila á sviði veiðimennsku.
Líta ber á sáttmálann um veiðar og líffræðilega fjölbreytni sem leiðbeiningar fyrir viðkomandi yfirvöld og hagsmunaaðila og lagt er til að aðildarríkin noti hann við innleiðingu og mótun stefnu um sjálfbærar veiðar og náttúruvernd.
Bæklingurinn Evrópskur sáttmáli um veiðar og líffræðilega fjölbreytni (pdf)
Fundargerð 29. fundar 2009 (pdf)
Fundargerð 28. fundar 2008 (pdf)
Umsjón: Jón Gunnar Ottósson