Hlutverk Náttúrufræðistofnunar Íslands

Náttúrufræðistofnun Íslands starfar samkvæmt lögum nr. 60/1992. Meginhlutverk hennar er að rannsaka íslenska náttúru og stunda skipulega heimildasöfnun um hana með því að :

• Skrá þær tegundir plantna, dýra, örvera, steinda, bergtegunda og jarðmyndana sem finnast hér á landi og í sjónum umhverfis landið,
• safna eintökum af þessum tegundum og varðveita í vísindasöfnum,
• vakta ástand hinna ýmsu dýrastofna og gróðursamfélaga,
• rannsaka lífshætti og vistfræði einstaka lífverutegunda og stofna og þá krafta sem ráða gerð og þróun íslenskrar náttúru,
• afla gagna um skriðuföll á landinu og meta vá af þeirra völdum,
• annast fuglamerkingar.

Einstök rannsóknarverkefni á Náttúrufræðistofnun skipta tugum. Mörg eru þess eðlis að þau taka ár og áratugi eða verður jafnvel aldrei fulllokið. Lýsingu á einstökum rannsóknarverkefnum er að finna undir viðkomandi fagsviði og starfsmanni.

Náttúrufræðistofnun hefur einnig víðtækt fræðslu- og ráðgjafarhlutverk og rækir það m.a. með því að:

• Miðla upplýsingum um náttúru Íslands til skóla, almennings og fræðasamfélagsins,
• aðstoða önnur söfn við gerð náttúrusýninga,
• leiðbeina stjórnvöldum og framkvæmdaraðilum um landnýtingu og vernd náttúruminja,
• gefa út fræðirit og náttúrufarskort yfir gróður vistgerðir og jarðfræði landsins.