Lífríkisvernd á norðurslóðum

Náttúrufræðistofnun Íslands hefur frá árinu 1992 haft umsjón með framkvæmd samþykktar um vernd lífríkis á norðurslóðum, Conservation of Arctic Flora and Fauna, skammstafað CAFF, fyrir hönd umhverfisráðuneytisins.

Í rammaáætlun CAFF 1998 - 2003 eru fimm megin áhersluatriði:

• Auka áherslu á vöktun líffræðilegrar fjölbreytni tegunda, búsvæða og vistkerfa.
• Aðgerðir til verndar erfðaefni, tegundum og búsvæðum.
• Aðgerðir til þess að koma á fót friðlýstum svæðum þar sem þau auka verndun vistkerfa, búsvæða og tegunda.
• Verndun lífríkis utan friðlýstra svæða til að viðhalda fjölbreytileika.
• Auka áherslu og kynningu á líffræðilegum fjölbreytileika og sjálfbærri þróun innan atvinnuvega.

Verkefni eftir 2003 eru háð útkomu úr rammaáætlun og frekara samkomulagi ríkja á norðurslóðum.

Samstarfsaðilar Náttúrufræðistofnunar eru sambærilegir aðilar hinna aðildarríkjanna, Finnlands, Svíþjóðar, Noregs, Grænlands, Bandaríkjanna, Rússlands og Kanada, CAFF-skrifstofan og ýmsir aðilar innanlands eftir verkefnum.

Verkefni sem nú er unnið að innan CAFF eru m.a. gerð gróðurkorts af norðurslóðum, sjaldgæfar (einlendar) háplöntur á norðurslóðum og útbreiðsla þeirra, verndaráætlun fyrir svartfugla (þ. á m. vöktun svartfuglastofna, ferðir svartfugla utan varptíma, ferðir svartfugla á varptíma og skráning svartfuglabyggða), skráning sjófuglabyggða, verndaráætlun um æðarfugla, válisti yfir sjaldgæfar plöntur og dýr á norðurslóðum, varpútbreiðsla fugla, áætlun um náttúruverndarsvæði (CPAN), skilgreining búsvæða, sjálfbær nýting skóga nærri skógarmörkum, upplýsingamiðlun um CAFF-samstarfið og samband milli gagnabanka um umhverfismál.

Umsjón: Ævar Petersen
http://arcticportal.org/en/caff/