GÖGN OG ÞEKJUR

Gagnagrunnur Náttúrfræðistofnunar Íslands

Stafrænir gagnagrunnar Náttúrufræðistofnunar geyma nú um 660.000 færslur um flesta lífveruhópa landsins, ásamt tegundum steinda, bergs, steingervinga og jarðhita. Einnig eru til umfangsmikil ófrágengin gagnasöfn sem verið er að koma á stafrænt form. Í gagnagrunnum Náttúrufræðistofnunar eru upplýsingar um náttúru landsins sem hvergi er annars staðar að finna. Þar að auki býr stofnunin yfir miklu safni af skýrslum og rituðum heimildum um náttúru Íslands.

Gagnagrunnur plantna

Útbreiðslukortin sýna útbreiðslu villtra plantna, en ekki ræktaðra. Útbreiðsla ræktaðara plantna, t.d. viðju, alaskaaspar, garðasólar og dagstjörnu kemur því aðeins fram þar sem þær hafa dreift sér frá ræktun af sjálfsdáðum eða sáð sér út.

Útbreiðslukortin spanna allt tímabilið frá ca. 1900 til 2005. Því nægir að t.d. slæðingur hafi sést einu sinni á þessu tímabili, til þess að hann komi fram á útbreiðslukorti, án tillits til þess hvort hann finnst nokkurs staðar á landinu í dag.

Aðeins útbreiðslukort fyrir blómplöntur og byrkninga geta gefið nokkuð raunsanna mynd af útbreiðslu tegundanna í landinu á grundvelli 10 x 10 km reitkerfisins, vegna þess að þær hafa verið skráðar í nánast öllum slíkum reitum. Útbreiðslukort fléttna og mosa eru töluvert gloppótt, vegna þess að þessir plöntuflokkar hafa ekki verið skráðir í nærri öllum reitum, en þó dreifist skráningarátak þeirra nokkuð jafnt yfir landið. Útbreiðslukort sveppa eru enn gloppóttari, því þau byggja nær eingöngu á safneintökum fremur en vettvangsskráningum, og söfnunarátak hefur verið mjög mismunandi eftir landshlutum.

Plöntulistar sem birtast þegar reitir eru valdir, ættu í tilfelli blómplantna og byrkninga að gefa nokkra hugmynd um þær plöntur sem vaxa á svæðinu. Þeir geta hins vegar verið mjög misítarlegir, þar sem í sumum reitum geta þeir byggt á skráningu á aðeins einum stað í reitnum, en í öðrum tilfellum geta verið til margar skráninga á ýmsum stöðum innan reitsins.

Ef leitað er eftir lista yfir fléttur, mosa eða sveppi í ákveðnum reitum getur verið að engin tegund komi fram, sem þýðir þá aðeins að engin skráning hefur farið fram í þeim reit.

Ef leitað er eftir örnefnum koma fram örnefni úr gagngrunnum Landmælinga Íslands, en sú leit hefur enga tengingu við skráningarstaði plantna í plöntugagnagrunninum.

Grunnkort og þekjur 

Landupplýsingaþekjur frá Náttúrufræðistofnunar Íslands

Reitir 10x10 km

Við öflun þekkingar á heildarútbreiðslu lífvera á Íslandi hafa sérfræðingar Náttúrufræðistofnunar Íslands skráð fundarstaði eftir reitakerfi sem samanstendur af 10x10 km reitum.  Reitakerfið byggir á kortblaðaskiptingu danska herforingjaráðsins þar sem miðlína norður-suður miðast við breiddarbaugu 65° en miðlína vestur-austur er samsíða lengdarbaug 19°  en 1 km vestar.  Hver reitur er auðkenndur með 4 tölustöfum þannig að tvær fyrstu tölurnar tilgreina lóðrétta dálkinn en tvær síðustu þann lárétta.

Plöntuvefsjáin byggir á 10x10 km reitakerfi NÍ og birtir punkta í mælikvarða stærri en 1:800.000 en útlínur reitanna í minni mælikvarða.

Gróðurkort, gróðurlendi 1:500.000

Gróðurkort af Íslandi sýnir einfaldaða samantekt á ríkjandi gróðursamfélögum.  Þar sem land hefur nokkuð samfellda gróðurhulu er sýnt hvers eðlis ríkjandi gróðursamfélög eru, hálfgróið eða minna gróið land flokkast eftir landgerð.  Kortlagning er byggð á gróðurkortum, loftmyndum, gervitunglamyndum og korti af birkiskógum og kjarri.   

Jarðfræðikort, berggrunnur 1:500.000

Jarðfræðikort af Íslandi, berggrunnskort, sýnir stærstu drættina í jarðfræði landsins.  Jarðlög eru flokkuð eftir aldri, gerð og samsetningu.  Einnig sýnir kortið vel gosbelti landsins og dreifingu gossstöðva frá nútíma.  Nútímahraunum er skipt í forsöguleg og söguleg hraun. 

Landupplýsingaþekjur frá Landmælingum Íslands

Grunnþekjur

Grunnþekjur eru eign Landmælinga Íslands og birtar með leyfi þeirra

Hæðarlínur

Vatnafar

Samgöngur

Þéttbýli

Örnefni

Landupplýsingaþekjur frá Umhverfisstofnun

Friðlýst svæði

Þekja sem sýnir friðlýst svæði er eign Umhverfisstofnunar og birt með leyfi þeirra

Lýsigögn

Vefsjá Náttúrufræðistofnunar Íslands er enn í þróun og vinnslu.