Hrossygla (Apamea exulis)

Útbreiðsla

Á norðurslóðum og í fjalllendi Evrópu og Asíu; hálendi Skandinavíu og Skotlands, Alpafjöll og Balkanskagi; norðaustanverð N-Ameríka, Grænland. Hrossyglu er skipt í nokkrar undirtegundir og hafa flokkunarfræðingar lengi átt í vandræðum með tegundina. Þess vegna eru upplýsingar um hana í nokkurri óvissu.

Ísland: Um land allt, jafnt láglendi sem hálendi; útbreiddust yglutegunda á miðhálendinu.

Lífshættir

Kjörlendi hrossyglu er einkum í þurru graslendi og valllendi, gjarnan sendnu, einnig á víðiflesjum með grösum. Lífshættir tegundarinnar í nágrannalöndunum eru tiltölulega illa þekktir, en þó ljóst talið að lirfurnar nærist á grösum, einkum neðri hluta stönglanna. Allt bendir til að það taki þær tvö sumur að vaxa upp, því bæði litlar og stórar lirfur finnast samhliða. Vetrardvali fer fram á lirfustigi. Tveggja ára lirfur púpa sig á vorin og fiðrildin skríða svo úr púpum þegar sumrar. Flugtími hefst um miðjan júní og stendur fram í ágúst, með hámarki á miðju sumri.

Almennt

Hrossygla er norðræn tegund sem þrífst hvað best hér á hálendinu og í sveitum í skjóli jökla. Annars er hún frekar lítt áberandi á láglendi þó hún finnst hvarvetna á landinu. Það er því athyglisvert hve mikið er af henni í úteyjum Vestmannaeyja. Það er þekkt að norðrænar tegundir sem búa við stuttan sumartíma taki tvö sumur í uppvöxtinn.

Hrossygla er meðalstór ygla og fjarri því að vera auðgreind frá nokkrum öðrum yglutegundum. Hún er nokkuð breytileg á lit, eins og þær flestar hinar yglurnar, oftast tiltölulega ljósbrún á lit með ljóst yfirbragð, stundum dekkri, með ljósa nýrnabletti og sauma yfir framvængina og dekkri blettum á milli. Stundum þarf að notast við kynfæragreiningar til að staðfesta tegundina.

Útbreiðslukort

Myndir

Höfundur

Erling Ólafsson 8. júní 2011, 6. febrúar 2019.