Krásarbobbi (Helix pomatia)

Krásarbobbi - Helix pomatia
Mynd: Erling Ólafsson
Krásarbobbi. 40 mm (kuðungur). ©EÓ

Útbreiðsla

M-Evrópa; Bretland, Danmörk, S-Svíþjóð, suður til N-Ítalíu, austur til Búlgaríu, Rúmeníu og Úkraínu. innfluttur til Noregs og Englands.

Ísland: Krásarbobbi er fágætur slæðingur í Reykjavík.

Lífshættir

Í heimahögum finnst krásarbobbi í gróðurþykkni og oft á ræktarlandi þar sem loftslag er ljúft og nægilegs raka nýtur við.

Almennt

Krásarbobbi var afar vinsæll af rómverskum matgæðingum á tímum Rómarveldisins og talið er að þeir hafi flutt hann með sér m.a. til Bretlandseyja á sínum tíma þar sem hann nam land. Enn er hann vinsæll forréttur á borðum matgæðinga. Krásarbobbi er mjög fágætur slæðingur til landsins með varningi. Algengara er að sjá bobbann gómsæta í frystiborðum matvöruverslana. Hann hefur þrívegis fundist lifandi hér á landi svo kunnugt sé, í öll skiptin í Reykjavík. Fyrsti krásarbobbinn sem kunnugt er um fannst í júlí 1999 og lék grunur á að hann hefði borist með vörum frá Danmörku. Sá næsti fannst í september 2008 skríðandi á stétt á Gelgjutanga, þar sem innflutningsfyrirtækin standa hlið við hlið, og hinn þriðji var skríðandi á gangstíg í Hólahverfi í lok maí 2009, sem erfitt er að skýra. Ólíklegt er að krásarbobbi nái fótfestu hérlendis. Til þess er hann væntanlega of hitasækinn. Heimild er um einn krásarbobba í Færeyjum (2007).

Krásarbobbi er stærstur landbobba í Evrópu og auðþekktur. Kuðungurinn er gráhvítur til ljósbrúnn og yfirborðið gjarnan slitið eftir langtíma núning við umhverfið. Hann er án spíralranda. Snigillinn sjálfur er ljósgrábrúnn með afar hrufótt yfirborð.

Krásarbobbi (Helix pomatia) - fundarstaðir samkvæmt eintökum í safni Náttúrufræðistofnunar Íslands
Krásarbobbi (Helix pomatia) - fundarstaðir samkvæmt eintökum í safni Náttúrufræðistofnunar Íslands

Heimildir

Jensen, J.-K. 2007. Insekter og andre dyr: Vinbjergsnegl Helix pomatia. www.jenskjeld.info/DK_side/indexdk.htm [skoðað 7.8.2009].

Pfleger, V. & J. Chatfield 1988. A Guide to Snails of Britain and Europe. Hamlyn, England. 216 bls.

Var efnið hjálplegt? Aftur upp

Aftur upp

Takk fyrir!

Hvað má betur fara?

  • Fela
  • |