Hálíngresi (Agrostis capillaris)

Mynd af Hálíngresi (Agrostis capillaris)
Mynd: Hörður Kristinsson
Hálíngresi (Agrostis capillaris)

Útbreiðsla

Algengt um allt landið á láglendi og nokkuð upp eftir hlíðum. Það er einnig mikið ræktað í túnum. Hæstu fundarstaðir hálíngresis eru í 750 m hæð í botni Glerárdals við Eyjafjörð og í 740 m í Hattveri á Landmannaafrétti og við Laufrandarhraun á Bárðdælaafrétti (Hörður Kristinsson -floraislands.is).

Almennt

Nytjar

Nytsöm beitar- og fóðurjurt, töluvert ræktuð í túnum.

Búsvæði

Vex einkum í grasdældum, brekkum og kjarrlendi (Hörður Kristinsson 1998).

Lýsing

Fremur hávaxið gras (30–80 sm) með snörpum blöðum og fíngerðum, rauðbrúnum punti.

Blað

Stráin eru stinn, hárlaus en mjúk, blöðótt langt upp eftir. Blöðin flöt, 2–4 mm breið, snörp. Slíðurhimna efstu blaðanna örstutt, þverstífð (Hörður Kristinsson 1998).

Blóm

Punturinn allstór, 8–16 sm langur, neðri puntgreinar fremur langar. Smáöxin einblóma, axagnirnar rauðbrúnar eða fjólubláleitar, 3–3,5 mm á lengd, ein- eða þrítauga, hvelfdar eða með snörpum kili. Blómagnir miklu styttri en axagnirnar, neðri blómögnin tvöfalt lengri en sú efri, týtulaus eða með stuttri baktýtu (Hörður Kristinsson 1998).

Aldin

Aldinið er hneta þar sem fræskurn og aldinhýði er runnið saman í eitt (Lid og Lid 2005).

Afbrigði

Stöku sinnum finnast hvítingjar af hálíngresi með hvítleitum eða ljósgulgrænum punti.

Greining

Oft getur verið örðugt að greina hálíngresi frá öðrum língresistegundum, eins og skriðlíngresi og týtulíngresi. Hálíngresið hefur stærri og breiðari punt og er oft hávaxnara en eitt öruggasta einkennið er hin örstutta slíðurhimna stöngulblaðanna.

Útbreiðsla - Hálíngresi (Agrostis capillaris)
Útbreiðsla: Hálíngresi (Agrostis capillaris)

Höfundur

Var efnið hjálplegt? Aftur upp

Aftur upp

Takk fyrir!

Hvað má betur fara?

  • Fela
  • |