Axhnoðapuntur (Dactylis glomerata)

Mynd af Axhnoðapuntur (Dactylis glomerata)
Mynd: Hörður Kristinsson
Axhnoðapuntur (Dactylis glomerata)

Útbreiðsla

Innfluttur á fyrri hluta 20. aldar og er ræktaður í sáðsléttum. Hann hefur ofurlítið dreifst þaðan og vex að staðaldri í túnjöðrum og víðar. Hann vex því að jafnaði aðeins á byggðum bólum og í næsta nágrenni þeirra (Hörður Kristinsson - floraislands.is).

Almennt

Nytjar

Er að finna í sumum grasfræjablöndum.

Búsvæði

Sáðsléttur og tún, slæðingur í grasbrekkum og meðfram vegum.

Lýsing

Hávaxin grastegund (50–120 sm) með stór hnoð á löngum puntgreinum. Blómgast í ágúst.

Blað

Blöðin breið, 4–7 mm (Hörður Kristinsson 1998).

Blóm

Smáöxin mörg saman í þéttum, stórum hnoðum sem standa utarlega á puntgreinunum. Puntgreinar mjög snarpar. Smáöxin þrí- til fjórblóma, mismikið hærð, axagnir fjólubláleitar eða gráar, þrítauga, enda í oddhvassri týtu, miðtaugin með uppvísandi broddum (snörp). Neðri blómögnin fjólubláleit eða gráleit, endar í oddhvassri týtu, fimmtauga með skörpum kanti um miðtaugina. Frjóhirslur ljósbrúnar eða fjólubláleitar, 3–4 mm á lengd (Hörður Kristinsson 1998).

Aldin

Aldinið er hneta þar sem fræskurn og aldinhýði er runnið saman í eitt (Lid og Lid 2005). Þroskar ekki fræ í öllum árum (Hörður Kristinsson - floraislands.is).

Greining

Líkist engri annarri íslenskri tegund, auðþekktur á hinum stóru, þéttvöxnu blómhnoðum.

Útbreiðsla - Axhnoðapuntur (Dactylis glomerata)
Útbreiðsla: Axhnoðapuntur (Dactylis glomerata)

Höfundur

Var efnið hjálplegt? Aftur upp

Aftur upp

Takk fyrir!

Hvað má betur fara?

  • Fela
  • |